我們怎麼了？: 17

「你喺屋企？」聽到阿斌的答案，我是有點失望，但並不感到奇怪。 

阿斌：「做乜？有波踢呀？」 

我：「唔係呀，係呀，你同秋凝點呀？」 

阿斌：「我冇打俾佢，做乜？」 

我：「關心下你地兩個點之嘛。」 





阿斌：「可以點，喂，建倫話星期日牛津道踢波，你約人啦。」 

我：「好好，我約好搵你。」 

「好，再見。」 

掛線後，我站在原地看著那個後街入口，考慮了一分鐘後，最後轉身到往G4的方向。 

我有點害怕，也有點自卑。 





秋凝一直對我來說，就好像是一種想追趕但永遠都不能掌握的東西。我從不確定自己想跟她會有什麼前景，但每隔一段時間我都會狠狠的想起她一次，就算是那一段她跟阿斌一起的日子。 

直到我知道她跟阿斌出了問題，我承認有幻想過再跟她一起的可能性，因為我覺得我們的關係已經因為阿斌的遠離而變得再次親近，甚至是有機會重接四年前那一段我覺得還未完全斷開的感情。 

但之前阿斌在電話所說的那一番話，還有詠莉昨晚跟我透露的消息，還有今天我自己親眼所見的畫面，我已經幾乎肯定，我和秋凝中間除了阿斌和詠莉之外，還有另一個人。 

一個可能是令秋凝懷孕的人。

我神不守舍的走到G4，坐到蔡卓妍的身旁，開了電腦之後就一直在想這件事。 





蔡卓妍：「諾仔，做乜事？」 

我：「冇呀。」 

蔡卓妍：「係咪唔當我朋友呀？我成日見你個樣，平時一嚟到呢度就好開心打機，有幾可會發哂呆咁。」 

「…………………」 

蔡卓妍：「講出嚟聽下，睇下幫唔幫到手。」 

我思量了一會，最後終於在蔡卓妍以三根手指向天發誓不告訴別人的情況下，將整件事向他傾吐了出來。說完一刻，不知道為什麼有一種很舒坦的感覺，或者這感覺真的敝了很久。 

蔡卓妍：「咁你自己有冇諗過想點？」 

「冇。」我搖搖頭 





蔡卓妍：「其實做每件事之前，都應該知道自己想點。」 

我：「秋凝同我講分手果一日，我仲係好記得。」 

蔡卓妍：「十三四歲咋喎，有咁深刻咩？」 

我：「第一次識鐘意人同拖女仔隻手喎，唔深刻？」 

蔡卓妍：「拖手仔咋？」 

我：「係呀，十三四歲啦你都識講，可以有啲咩？」

蔡卓妍：「但你宜家都有一個女朋友，仲可以同秋凝點？」 





我：「但佢有事，唔通唔理佢。」 

蔡卓妍：「但其實佢都冇話要你幫。」 

「……………」蔡卓妍一矢中的，我也無謂再裝救世者：「咁又係…」 

蔡卓妍：「秋凝呢個女仔一定比起你同你老死阿斌聰明，因為到宜家，就只有佢自己最清楚成件事係點。我明你想點，你想就最好喺你女朋友唔知道嘅情況下去同秋凝有咁親近得咁親近，係咪？」 

我：「係。」 

蔡卓妍：「跟住呢？」 

我：「跟住…唔知……」 

蔡卓妍：「唔係唔知，你係想確定咗秋凝會同你一齊，你就會同詠莉分開？」 





我：「如果係…會唔會好賤格？」 

蔡卓妍：「但宜家秋凝可能有其他人嘅BB，先唔好講賤唔賤，你真係唔使諗下詠莉？佢對你唔好咩？你地感情好差？」 

我：「我地感情好好，佢仲話會等我讀完書返，佢一直都對我好好。」 

蔡卓妍：「所以呢個唔係賤唔賤格問題，係你自己落注嘅問題。秋凝點睇都係一個玩家，計埋你起碼有三個男仔佢跟進緊，但如果唔係你親眼見到，佢宜家都仲可以神不知鬼不覺咁繼續行事。 

而詠莉呢？一個一直都對你好好嘅女仔，你打算為咗一個對佢未完夢嘅玩家去計劃放棄佢，牌面就點都唔抵，但愛情當有一樣嘢又真係好難講。」 

我：「係乜？」 

蔡卓妍：「情意結，即係果個人無論幾差，就算俾你聽到又睇到，你都會幫佢搵一百個藉口去解釋；佢只要望你一眼，你就會成晚訓唔著果種。」 





蔡卓妍說中我的心事，秋凝對我來說，的的確確是一個情意結，就算這麼多年來，我也沒有辦法擺脫。 

我：「如果係你，你會點？」 

蔡卓妍：「如果係我？你成日問我點解自己一個嘅？」 

我：「你話你屋企人喺泰國嘛，得你一個喺香港跟住阿婆。」 

「咁不如等我講一個情意結嘅故事你聽啦。」蔡卓妍拍拍我肩膀說