[找數][外傳]「空白的五年」: 你好
我一個人係度摷番呢五年既野，試下可唔可以記番D乜。
Facebook，instagram呢D社交app我都睇番哂，唔止係自己既，Cherry既我都睇左。
但我咩都搵唔到，個五年直頭好似空白既一樣。
所謂既咩都搵唔到，係指一張同佢既合照都搵唔到。
真係好奇怪，據我既印象，佢係一個好鐘意影相既人，無乜可能會五年都唔影相架。
可能你會話，影左唔代表要擺上網架嘛，但一張都唔擺會唔會太奇怪？
我真係R爆頭都諗唔明，於是我決定趁Cherry返左去佢屋企果陣偷偷地咁問美星。
畢竟係有血緣既姐弟，應該可以信得過既。
我：「喂家姐，有野想問下你。」
美星：「居然肯叫我家姐，睇黎係正經野喎，問啦，知既我實答。
」 我：「可唔可以話我知，過去五年我大概做過D乜。」
我全神貫注咁望住美星對眼，想話佢知我而家好認真。
靠你啦家姐，我好少可咁信人架，唔好令我失望。
美星：「吓，乜你唔係已經..」
我：「其實我未記起所有野，求下你，唔好話俾Cherry知，我唔想佢唔開心。」
美星：「唔…好啦我怕左你，你咁大個人都好少求我，我就做下好心啦今次。」
我：「多謝你。」
美星；「咁我大概咁講下啦，畢竟呢幾年我都忙，好多時間放左係間cafe度，無乜都理你。」
我：「嗯，麻煩你啦。」
美星：「嗱，你DSE果陣成日同你班Friend玩，可以話係祼考DSE咁濟，最後好似得唔知17定18分。」
「當時你自己都已經打定輸數準備讀IVE HD架啦，點知OU又收左你喎，你真夠運。」
啊，我都知我成世人都夠運架啦。
「之後你咪hea下hea下咁讀囉，我都無過問，之後就grad啦，係咁多。」
吓？得咁多？
我：「咁你知唔知我同Cherry呢五年發生過D乜？」
美星聽到我咁問之後就成個人震左一震，唔通嚇親？
美星：「你…做乜咁問？」
我：「因為我覺得好奇怪...Facebook又好instagram又好，我都搵唔到呢五年同佢既合照。」
美星：「哦…我唔知你地吖！我都話左呢幾年我好忙，呀！我要出去啦！係咁先！」
佢講完就即刻入房換衫走人，無俾機會我發問。
奇怪，好奇怪，佢好似有野瞞住我。
不過都要多謝佢，因為佢我大約知我呢五年做過d乜。
而家只係爭呢五年同Cherry既回憶，同六年前連接幾件事既原因。
好，距離終點不遠了。
一鼓作氣咁…
「咕~」
仆街肚餓添。
落街買個M記先。
我踢住拖，好快咁狗衝去M記買外賣，想儘快返屋企邊睇《機動戰士高達UC》邊食。
我唔記得哂D內容，只係記得頭三集咋屌。
就係我買完M記，返航途中俾人擊中，呀唔係，係俾人叫住左。
「魯路修？」
我係係同一個女仔擦肩而過果時被叫住的。
我下意識咁拎轉頭睇下係邊個叫我，結果就同一個女仔對視，仲要係四目交投。
企係我眼前既係一個好清秀，好文學少女feel既女仔，感覺好似《建築學概論》既秀智咁。
雖然佢係好靚，但我對佢一D印象都無。
唔通佢係我呢五年先識既人？
女：「果然係你呢，點啊？無事嘛？聽人講你前排暈左喎。」
我：「Hi..你係..？
」 女：「你唔記得我呀？傳聞話你失左憶，原來係真架？
」 「我係Ada吖，林穎欣。
」 呢下真係震驚了十三億人了，唔同左咁多既佢？
唔係喎，可能佢幫到我喎。
我：「你有無時間？我有少少野想問你。」
我搵到捷徑了。