[找數][外傳]「空白的五年」: 誓言

Lulu：「唔好問啦，跟我走就對了。 」 

佢用一個好堅定既眼望住我黎講，好似示意我將一切都交比佢咁。 

就交比佢啦，可能會有意外驚喜呢。 

我：「咁，好啦，信你架啦，唔好令我失望吖。 」 

lulu：「YES YOUR MAJESITY。」 

佢之後就帶左我去坐巴士，去左尖沙咀碼頭。 



我：「黎碼頭做乜？ 」 

佢無應我，只係默默咁拖住我去文化中心對出既海邊。 

佢咩都無講，只係默默咁望住維港。 

我係覺得奇怪，但無出聲，我選擇靜靜咁陪佢睇，仲挨住係佢膊頭。 

其實，維港都幾靚吖，點解我之前無諗過同佢黎既？ 

睇左十五分鐘左右，佢都仲係無講乜野，但眼神變左，變左少少，曚起左。 

我：「lulu？」 



lulu：「走喇，去下一站。」 

吓，咁突然？ 

不過都睇左咁耐囉，都夠哂啦，等我期待下下一站會係咩先。 

佢又帶番我去碼頭，揀左去灣仔既船。帶我入去。 

上到船佢揀左船頭既位置，仲坐係窗口位。 

今次佢仍然都係乜都無講，不過今次佢有搭住我膊頭。 

佢只係一味咁望住個海，好似若有所思咁。 

佢由頭先開始就怪怪地…我有少少在意… 



落船之後佢拖左我去會展，咁岩個時搞緊咩美食節，佢就同我買飛入去行，入去係咁試食，最後仲買左少少野。 

雖然有好多好野食我係好開心，不過有樣野令我非常之在意，搞到我無辦法全情投入同佢玩。 

就係佢全程都臉無表情，好以無左感情咁好冷漠。 

平時好容易就笑既佢好似變左另一個人咁，講野既語氣都一樣，變得好平靜，無一絲既感情。

我同佢係美食展逗留左大概兩個鐘頭左右佢就話去下一站，我只好乖乖服從。 

我開始覺得佢可能隨時會發脾氣，所以我唔敢提出D咩質問，以免刺激到佢。 

佢而家就好似入左認真mode既晨哥一樣咁得人驚，氣勢已經可以食人咁。 



離開會展果陣個陣已經係日落，咁岩我地出黎既位置係金紫荊廣場個位，又可以見到多一次維港。 

黃昏下既維港，比頭先既仲靚，橙黃色既海，好靚。 

我：「好靚…」 

我衝口而出，發現之後馬上用右手掩住自己個嘴，就好似小朋友做錯事咁。 

點解我會咁驚… 

「嗯。」 

咦？ 

佢回頭望一望維港，拋下一個單字就繼續向前行，好似無被呢個美㬌迷住咁。 

佢帶左我去一個巴士站，咩都無講只係企左係度等，但一架又一架巴士經過佢都無上車。 

我抬頭望一望巴士站牌，幾乎所有巴士都已經黎過至少一次，佢究竟想做乜？ 

正當我就快忍唔住問佢果陣，佢向馬路伸手，招來一架巴士，一架去機場既巴士。 

佢想去機場做乜..？ 

上車之後我不停咁諗呢個問題，但我始終無開口問佢，唔敢問。 

車程途中我不時偷望下佢，但佢只係一味望住前面，木無表情。 

我好唔想咁快到，但巴士始終要到終點站，無得避，我地到左機場。 

今次佢無再拖住我，而係雙手插袋自己行入客運大樓，我只好跟係佢後面。 

佢行到離境大堂入禁區個位之後就停低左，仲四圍望。 

「應該都有一段時間無黎機場啦，對上一次同你一齊黎係幾時？」 

佢突然開聲，仍然係無感情既語氣。 

「eh…」 

我一時之間答唔到佢。 

Lulu：「無記錯既話，係六年前吖可？」 

「送你機果陣。」 

佢…記返起？ 

「如果無同妳相遇既話，呢五年我就唔洗咁寂寞，亦唔會令自己咁心痛。」 

果然記返起哂啊...

佢到底係幾時記返起..？ 

我：「lulu…」 

lulu：「嗯，我記得返哂啦。」 

lulu：「你應該好清楚，無人可以係我面前講大話，我亦好憎人呃我架可。」 

我：「我知…我只係…」 

lulu：「既然你知道，點解你仲要咁做？」 

佢打斷左我既發言，自己一個係度講。 

「係我坦白向你認我未記番起五年黎既時候，你做左D乜？」 

我：「我…」 

「你並無選擇坦白講呢五年真正發生左咩事，而係作左一段假既過去出黎。」 

「老實講，我寧願呢五年繼續留白，或者等佢慢慢自然記返起，都好過你講大話。」 

我：「Sorry…我只係想彌補呢五年既遺憾同過錯…」 

我開始忍唔住喊，原來被拆穿之後個心會係咁痛，完全超出我預期。 

「Sorry？你做錯左D乜？」 

唔？ 

我係咪聽錯？ 

我：「我呃左你，好對唔住… 」 

我唔敢直視佢，好慚愧… 

lulu：「嘛，既然你肯認錯，咁你肯點補償。」 

我：「咩都可以，只要你肯原諒我。 」 

我係認真，而家為左可以得到佢既原諒，我咩都可以做。 

因為我唔可以再一次無左佢。 

「咁，以後都唔好再講大話啦，仲有以後都要留係我身邊。 」 

…？ 

我慢慢咁抬起頭，但係睇唔到佢個樣，只係見到佢個心口。 

Lulu：「同你玩下咋傻婆，唔洗驚成咁。」 

講完佢就抱住我，仲將我個頭埋入佢懷內。 

「頭先我同你去既所有地方，就係呢五年我想同你去既地方。」 

「無遇上你既話，我又點會知有咁多人對我好吖傻。 」 

我喊到收唔到聲，因為我頭先真係好驚，驚佢會講分手。 

當佢話原來只係講笑，我先可以放心，亦再控制唔到自己既淚線。 

心情大起大伏，真係會好攰，我而家成個人都無哂力咁濟，只可以挨係佢身上。 

「我返黎啦Cherry，我唔會再走，所以你都唔好再走，大家都唔需要再講大話，ok?」 

我答唔到佢，只可以係佢懷內不停咁點頭。 

Lulu：「咁，行啦我地，時間都差唔多啦，我約左人食飯。 」 

約左人食飯？邊個？

佢拖住我去巴士站，同頭先黎機場既時候好唔同，佢一直都係我旁邊，仲好好笑容。 

好快，我地就上左一架去市區既巴士。 

全程車，我都挨係佢膊頭，佢就用另一隻手摸我個頭，感覺好warm。 

呢個先係我識既魯路修，係我想要，係我鐘意既魯路修。 

不過，我仲係有少少野諗唔明。 

我：「我講大話你真係唔嬲？仲要係D咁重要既事既上面講…」 

lulu：「嘛~我開頭係幾嬲架~但我同美星傾過，諗法就唔同左了。」 

我：「唔同左？」 

lulu：「善意既謊言，其實都係可以接受既，更何況...」 

佢講到「更何況」我就忍唔住吞左一下口水，好似準備迎接佢之後會講既野咁。 

「你都只係想追番呢五年想做既野啫，我都係一樣，所以我今日先會帶你去呢d地方。」 

「而且你係我最愛既人，所以我原諒你，一次咁多，下次唔好啦知唔知？ 」 

我：「嗯，我下次唔會架啦！ 」 

我好似一隻花貓咁痴住佢，唔想分開。 

返到市區，佢帶左我去一間餐廳，一間我地從未去過既餐廳。 

間餐廳係要上樓，裝修幾得意，旁邊有一個好大既漫畫櫃，仲有好多男女係度玩唔同既game。 

呢度既氣氛好舒服，好適合傾計。 

我：「你約左邊個？」 

lulu：「唔？哦佢係果度呀你睇下。」 

佢？ 

我望向佢所指既方向，見到Ada坐左係度，旁邊仲有一個男仔。 

咦？有兩個魯路修？ 

我嚇到合唔埋個口。

Ada：「咁遲架你地。」 

Lulu：「喂Sorry，岩岩係機場出黎，Hi，Kingsley。」 

「Hi，魯路修。」 

果個好似魯路修既男仔應左lulu。 

我：「lulu你仲有個兄弟架咩..？」 

我好細聲咁同lulu講，以免比Ada佢地聽到。 

Lulu：「你都覺得我地好似樣？」 

我點頭以示同意。 

Ada：「坐低先講啦你兩個。」 

Lulu：「噢，坐低先啦傻婆，一陣同你介紹。」 

佢笑住咁推我過去坐低。 

哇，近睇兩個真係好似樣，輪廓一樣咁濟，膚色又差唔多，只係呢個男仔頭髮長過lulu好多啫。 

Lulu：「唷，同你地，呀應該係同你介紹，呢位係我女朋友Cherry。」 

我：「Hi…Ada我地好耐無見，你好似唔同左好多…」 

Ada：「係咩哈哈，我又無乜特別覺得自己唔同左喎，不過同你介紹先，呢位係我男朋友Kingsley。」 

Kingsley：「Hi，Cherry，好高興認識你。」 

佢好好禮貌喎，感覺幾成熟，唔似lulu成個大細路咁。 

之後我地都係度傾計飲野，原本我面對Ada都有少少尷尬，但佢又好似無乜野，所以我都無特別在意lu。 

Ada：「聽講你地就快結婚？」 

Lulu：「嗯，今年內。」 

Ada：「恭喜哂喎~搵我做姊妹啦Cherry~ 」 

我：「嗯，好，一定。」 

係呢個時候，Kingsley電話響。 

Kingsley：「我出去聽個電話先。」 

Ada：「嗯，快D去啦。」

我都無特別留意Kingsley出左去幾耐，但我見Ada不時會分神去望下個門口，望既次數令我feel到佢出左去有少少耐。 

我：「咦Kingsley出左去有少少耐喎，Ada你洗唔洗去睇下佢咩事…」 

Ada：「唔使啦，佢返黎喇。」 

我擰轉頭一睇，佢又真係返左黎喎，又唔咁岩係呢個時候既。 

但佢望落有少少怪，好似好唔好意思咁。 

Kingsley：「Sorry吖，我鋪頭有少少事我要走先…」 

嘩咁突然都有既。 

lulu：「咁不如我地埋單？」 

我：「都可以啫。」 

Ada：「你走先啦Kingsley，我想坐多陣，唔洗擔心，有lulu…佢地會同我返屋企架啦。」 

呃… 

Kingsley：「咁麻煩你地啦，呢餐我請啦，返到屋企WTS我吖記得。」 

佢講完就放低兩張五百蚊走左去。 

氣氛一瞬間變到好尷尬，大家都無出聲，deadair左。 

Lulu：「吖…Kingsley好似好忙咁吖可。」 

Good job喇傻佬，打開左話題。 

Ada：「最近佢成日都話忙，都唔知係咪真既，唔好講呢D啦叫多杯野飲先！ 」 

佢之後order左杯唔知咩酒，一邊同我地傾返以前既事，仲傾得好激動。 

佢連續飲左好幾杯，最後醉到不省人事。 

我：「點算好吖傻佬？」 

lulu：「eh…我唔知佢住邊棟樓喎…點算好吖？總無理由帶佢返我地度架…」 

我：「但而家好似得番呢個選擇咋喎…你打比家姐問下佢點睇？」 

lulu馬上打比家姐，講左兩句就收線。 

我：「家姐話咩？」 

lulu：「佢叫我地帶Ada返去，話唔可以俾一個醉左既女仔留係街。」 

我：「咁我地走啦，我扶佢。 」 

lulu：「你叫我扶我都唔會扶佢。 」 

我：「點解吖好衰囉你。 」 

lulu：「因為我只會掂你一個。 」 

我：「又口花花 ，走啦。 」 

係呢d時候都要搞笑既真係。 

我地埋完單就落樓截的士，好快就返到屋企，Ada仲係無反應，我只好先安置佢係我間房。 

我之後行出廳，見到lulu同家姐講緊野。 

美星：「你個咸濕仔今晚乖乖地留係房吖，俾我知你亂黎？你死硬吖。 」 

lulu：「思想污穢，我返入房打機唔好？Cherry，Ada就拜託你啦~ 」 

佢一臉事不關己咁走入房，留低我同家姐。 

美星：「仆街仔 ，咁阿妹我地幫你朋友抹身先啦好無？ 」 

我：「嗯，麻煩你吖家姐。 」 

美星：「傻啦講呢d。」 

咁之後我地就用暖水濕左兩條毛巾，鎖好房門開始幫Ada抹身。 

唔知係咪因為䁔毛巾好舒服，Ada開始有少少意識，係度自言自語。 

佢第一句就已經嚇親我。 

「魯路修…」

唔止我嚇親，我估家姐都嚇親，因為我見佢聽到之後即刻停哂手。 

美星：「我係咪聽錯？ 」 

我：「我都聽到…」 

「魯路修…你要…」 

「我真係…」 

「Cherry…」 

又黎啦，又開始自言自語。 

美星：「屌，都係快快手整醒佢先得。 」 

家姐開始拎條毛巾起勢咁捽Ada塊臉，好快就整醒左佢。 

Ada：「咦…呢度係…哇我個頭好痛…」 

我：「呢度係lulu屋企吖，頭先你醉到不省人事，我地唯有帶你上黎先…」 

Ada：「哦…麻煩哂啦，咁我返去啦。」 

佢一臉唔好意思咁，應該覺得自己麻煩到我地。 

其實又點會麻煩吖，大家朋友黎架嘛。 

不過我而家有野想問佢，好想問清楚。 

「Ada，其實你係咪仲鐘意魯路修吖？」 

我之所以會咁問，可能係女人既直覺啦。 

我好冷靜咁講，換黎既係一片沉默，成個場面都凍結哂。 

我同佢只係互相對望，大家都無講野。 

美星：「吖我去沖杯茶先，呢位阿妹應該想飲少少野清醒下架可。」 

家姐講完就笑笑口咁出左去，我即刻鎖返道門。 

我：「而家得番我地兩個啦，有咩唔怕講啦。」 

Ada：「嗯…Sorry吖，我知咁樣係好衰…不過我唔會阻住你地架，你唔好話比佢知好無？」 

果然呢... 

Ada：「我以為自己遇上Kingsley就會放得低，點知早排遇返佢，一堆回憶就湧上黎…」 

我：「你同Kingsley一齊，因為佢同魯路修好似樣？」 

Ada：「嗯，我第一次見佢真係以為佢係魯路修添..」 

睇黎呢五年黎，痛苦既唔只係我同lulu…

我：「嗯，我都以為lulu仲有個兄弟。」 

Ada：「起初我都特登唔去理佢，因為我諗起以前魯路修同我講既野。」 

我：「lulu同你講既野..？」 

Ada：「佢以前同我講過，每個人都係獨一無二，Kingsley同魯路修歸根究底都係兩個唔同既人。」 

Ada：「我唔可以當佢係魯路修，我起初係咁提住自己。」 

我：「嗯…」 

Ada：「但係佢對我好好，成日陪我，用果副同魯路修幾乎一樣既樣對我好。」 

我：「所以你最後都係接受左佢？」 

Ada：「嗯，係咪好傻吖我？」 

佢已經講到眼濕濕，好似想喊咁。 

我：「唔係吖，最重要既係佢對你好吖嘛，係咪？」 

其實我覺得我而家講乜都無用，點講都只係對佢造成二次傷害。 

Ada：「嗯，佢對我好好，我慢慢就接受左「佢係Kingsley，唔係魯路修」呢個事實。」 

「直至早排我遇返魯路修，佢問我呢五年佢同你既事。」 

哦..？ 

我：「之前WTS我既人係你？」 

Ada：「係吖，我對佢講左一個可以話唔係大話既大話。」 

我：「就係呢五年我一直都係佢身邊。」 

Ada：「無錯。」 

原來幫我既人係Ada… 

Ada：「見返佢之後，我先發現自己根本無忘記過佢，只係收埋左。」 

「我開始不自控咁比較佢同Kingsley，發現就算Kingsley做得幾好都好，我始終都係…」 

佢講到呢度就停左，無再講落去。 

Ada：「所以，你要對佢好，要同佢幸福，因為佢揀既人係你，當係為左我，應承我好冇？」 

佢把聲已經開始沙啞。 

我：「嗯，我發誓，我會對佢好，一定會同佢幸福咁過，用埋你對佢既果份愛。」 

我攬住佢，一隻手輕掃佢背，一隻手摸摸佢個頭咁講。 

呢一個係一個唔可以違背既承諾，唔止係因為Ada，同時亦係為左自己。 

得來不易既幸福，要好好掌握，因為咁係對其他無辦法同自己愛既人相愛之人既一份尊重。 

魯路修，你知道左既話會點..？