[找數][外傳]「空白的五年」: 復活

「魯路修，條女…」 

我：「嗯，我知道，我知道佢九成係仲鐘意我。」 

我一邊飲美星沖既紅茶一邊講。 

美星：「係勁喎，咁你會點處理先？講明先吖，我最憎人一船踏兩船。」 

我：「我都係，所以我唔會咁做。」 



美星：「咁你會做吖仆街仔。」 

我：「你落返黎我先話你知好無？」 

因為佢而家坐係我張書檯度，用個死人背脊對住我。 

美星：「屌，講得啦咁？」 

佢終於肯落返黎，Thanks God。 



我：「一切保持現狀已經係最好既處理方法，六年前我一樣係咁做。」 

美星：「唉點解你會有咁多靚女鐘意，你有邊度好。」 

我：「哥就是個傳說。」 

美星：「姐是你姐，屌打你的姐，唉我出返去啦，遞茶比佢兩個。」 

我：「嗯，留佢係度訓啦，咁夜唔好比佢一個女仔返去，我可以訓廳。」 



美星：「家姐有分寸，唔使你訓廳既。」 

佢講完就關埋道門出左去，留低我一個。 

「呼…」 

我擺低杯茶，放哂兩隻腳上檯。 

無諗過最後大直路先會彈單咁既野。 

其實我第一眼見到Kingsley就已經懷疑過，只係一直都同自己講「無可能既」。 

不過就算而家發生左，我都無乜需要處理。 

由Ada揀左Kingsley果刻開始佢就知道自己需要逃避，我去參一腳反而適得其反。 



短短一個月，居然可以發生咁多事，可以話重播左自己人生一次咁。 

又失憶，又遇返咁多中學同學，感覺好奇妙。 

啊，講起失憶，其實我一開始已經完全復活左，係Cherry帶我去昂坪之前已經記返起。

唔，準確D黎講，係佢話「之後結婚」果下刺激到我。 

所有野「叮」一聲咁返哂黎，無我想象中咁大衝擊。 

送佢機個幕，佢話我知佢要去外國果下全部返哂黎。 

果一刻我意識到而家我接收到有關果五年既資訊係錯既，呢五年Cherry並無係我身邊。 



我知道佢要呃我，果一下係好嬲，不過我無馬上講出黎。 

因為前一刻我先話自己未記番起，而家突然話自己已經記得會好怪。 

而且，我都想睇下佢想點演繹呢五年。 

所以，我無講，亦因為咁，打從呢刻開始我已經決定左最後點都要原諒佢。 

因為而家我都講緊大話。 

佢之後帶左我去好多地方，佢無特別解釋呢D地方係幾時去過，只係好開心咁同我去玩。 

我就知道佢只係想彌補同我之間空白左既五年，但我始終有啖氣吞唔落。 

我決定去搵美星傾，結果被佢鬧左一餐，話我唔明白Cherry既苦心，仲話五年黎痛苦既人唔只我一個。 



我自己一個諗左好耐，搵下台階比自己。 

最後我搵到，方法就係等佢做完呢五年想做既野之後就輪到我做，之後再同佢講。 

但當我做既時候，發現自己內心好矛盾，開心又心痛，自己都解釋唔到。 

睇維港，坐天星小輪呢D小事係我呢五年黎發夢都想同佢做既事，終於做到。 

但，好似太遲，而家做到好似已經無乜感覺。 

定係我諗得太多？ 

之後我去機場，同佢坦白，嚇到佢喊哂口，果一刻我終於清醒。 



見到佢喊，我個心就好似融化左哂，完全嬲唔落，仲想去保護佢。 

果一刻我就知道我心入面其實一直都無嬲佢，只係想借呢個機會追返呢五年。 

同佢一樣。 

所以我同佢講我無嬲，只係玩下，仲要佢要一直留係我身邊同唔好再講大話。 

我覺得自己收尾收得幾靚幾好，所有野做齊哂。 

同Cherry既關係亦真正復活左，仲更加堅定，因為我知道自己已經唔可以再一次無左佢。 

哇，六點半架嗱？原來我坐左咁耐，杯茶都凍哂，自己都唔知添。 

好，起身煮個早餐比佢地三個先。