[找數][外傳]「空白的五年」: 進化
我慢慢行出廳，一個人都無，其餘兩間房既門仍然緊閉住，佢地三個應該未醒。
好，咁就等我露兩手啦。
四人份量既早餐，我都係第一次煮，煮乜好呢？
都係炒蛋，煙肉和多士啦，最簡單又唔單調。
仲要加多杯咖啡，perfect池。
講多無謂，行動最實際，煮左咖啡同打蛋先。
「Databse Database just living in the datebase~
」 我一邊唱歌一邊煮，好快就有好香既味出左黎，我太勁了。
「有乜食？
」 屌！嚇撚死我！
美星無啦啦係我後面講野，嚇到我幾乎甩手跌個pan落地。
我：「屌，比你嚇親
，喂你著番條褲先啦好嘛，有外人係度。
」 無錯，佢而家應該無著褲，只係著住件長身d既t-shirt，佢成日都係咁。
美星：「係喎屌，一陣著返先，咁有咩食啫屌你。」
我：「咪又係煙肉炒蛋同多士，快d走開啦阻頭阻勢，就煮好啦。」
美星：「巴鳩閉啦你。
」 佢一路講一路走，而我就開始上碟，因為已經煮好。
唔，唔錯，擺碟幾好，抹埋碟邊先。
抺完碟我就拎哂四碟野出餐檯，之後又走返入廚房倒三杯咖啡。
點解係三杯咖啡？因為我唔飲咖啡，我另外沖左壺紅茶比自己。
Set好哂野之後，我叉腰望住張餐檯。
呼，呢五年黎D煮野經驗都返左黎，非常好，起碼無煮燶先。
沖咖啡既技術都無退步，手感仍在，如果唔係實比美星打死。
呼，好啦去叫佢地起身啦。
我走到Cherry房門，準備敲門。
咦，咪住先，我唔知入面咩環境，男女授受不親，都係唔好。
都係等美星叫佢地啦。
咁岩美星呢個時候都出左黎，著返條褲。
美星：「成棵樹咁企係度做乜。
」 我：「喂啱哂，你幫我叫佢地起身，我唔方便叫。」
美星：「有乜撚野唔方便，你黎M？
23歲人仲咁怕羞，得啦我叫啦。
」 雖然好想還拖，但唔知點解駁唔到。
我坐低左，無理美星，開始一個人嘆茶。
過左一陣，美星就推住佢兩個出黎，兩個個樣都好攰，尋晚應該傾到好夜。
不過佢兩個見到份早餐就即刻開眼，仲俾左同一個反應。
「哇…
」 我：「快d食啦，多士凍左唔好食。
」Ada：「哇你識煮早餐…」
我：「哦，呢D好普通啫，不過耐無煮野，可能會唔係咁好食，唔好太高期望。」
美星：「唔係吖幾好食，杯咖啡唔錯，仲記得我教你點沖？」
佢已經係狼吞虎嚥咁食哂成份早餐。
Cherry：「係囉幾好食，好似有一段時間無食過你煮既野。」
Ada：「我都覺得幾好食…」
我：「咁就好，大家開心就好。」
我一邊嘆茶一邊望住佢地講，發現Ada望住杯咖啡，個樣好似好尷尬咁。
我：「你唔飲咖啡？」
我好直接咁問佢，好似嚇親佢，佢成個人震左一震。
Ada：「係吖唔好意思…」
我：「噢，唔緊要，我仲有一壺紅茶，要唔要杯？」
Ada：「好吖麻煩你。」
我企起身，走入廚房倒過杯紅茶比佢，佢亦開懷咁飲，仲添左兩杯。
Ada：「真係對唔住，打擾到你地，要你地照顧左我一晚，咁我走先啦。」
佢疊起左佢用過既杯碟，仲對我地鞠躬，哇我真係受唔起。
Cherry：「唔緊要啦我地係朋友黎架嘛，我送你番去吖。」
Ada：「哦…好吖…」
「魯路修入黎！」
美星突然係房入面大叫，嚇親仲係廳既我地三個。
屌，係外人面前呼喝我會搞到我好無臉架。
我一路搖住頭咁行入佢房，睇下佢究竟搵我咩事。
入到去就見到佢放左自己對腳上書檯，手就拎住杯咖啡係度飲，同㝷晚既我好似，直頭一樣。
我：「搵我咩事？
」 我用一個幾唔耐既語氣同佢講。
美星：「陪阿妹送果個女仔返去。」
我：「吓咁麻煩…Cherry去咪夠…」
美星：「信我啦，之後你就會有野想同阿妹講。」
奇奇怪怪咁，麻煩。
算啦就聽佢說話去做啦。
我行返出廳，走入自己房拎件外套就去搵Cherry佢地。
我：「行喇我地，送你返去。」
其實都係同一個屋苑，路程應該唔會長得去邊。
但佢兩個好似有心拖慢黎行，用個阿公阿婆散步既步速前進。
通常用呢d步速行得多數係有野想講，不過佢兩個乜都無講，連眼神交流都無。
佢兩個只係默默咁行。
而我，只好跟係佢兩個後面行。
情況好似有少少尷尬…
為左令自己可以自在少少，我決定玩電話，做個低頭族。
呢招效果滿分，玩左陣已經聽到佢話到左喇。
我急急收起電話，費事俾Cherry見到又會鬧我。
Ada：「咁，有機會下次見喇。」
我：「噢，實有機會既。」
Cherry：「魯路修，你係度等我吖，我送埋Ada上去。」
吓，洗唔洗吖，而家日頭，又送到樓下啦喎，仲要送埋上去？
Ada：「吓唔洗啦…」
Cherry：「得啦~行喇行喇~」
我：「喂…」
Cherry：「乖啦係度等我一陣。」
佢講完就同Ada行左入樓，留低我一個on99企係度。
我好似被拋棄了…
「係度等我一陣」，即係我唔可以行開啦，要企係度等佢。
消磨時間最好既方法都係聽歌，聽住歌咁等佢啦。
「修羅」，「曇天」，「SIGN」，「Unlimtied Sky」，「Last Stardust」，一首又一首咁聽。
聽左大慨三四個字左右，佢就出左黎。
正當我想行過去接佢果陣，我察覺到佢有少少奇怪，所以我跑左過去。
點解話覺得佢怪？解釋唔到，直覺。
我第一下既反應係攬住佢，摸佢個頭。
Cherry：「lulu…」
佢抬起頭望住我，對眼水汪汪，果然有事。
不過我又唔想問佢發生咩事。
我：「返去之前，陪我行下好無？」
我明美星之前講既係咩啦，我而家的確有野想同Cherry講。
美星的確神機妙算，佩服佩服。
只係我而家需要儲下氣，所以我先叫佢陪我行下。
呼，希望可以順利咁講到啦。
行過商場，又行過公園，兜兜轉轉咁最後同佢去左商場既平台花園，搵左個位坐低左。
每過一秒，我就愈緊張。
好似《龍珠》入面，超三悟空打布歐果陣儲氣會漏氣咁，我而家就係呢個情況。
明明覺得自己已經儲夠氣，但又覺得自己好似差咁少少野，係咁拖時間。
拖得愈耐，我就愈急，但就算急，我又偏偏無勇氣行動。
唉，真係人都顛。
「lulu..？
」 佢係我煩緊果陣叫我，一下就撃退哂我所有念頭，拉我返現實。
我：「係！有咩事？
」 屌點解我既反應好似好心虛咁，頭先既勇氣去哂邊？
Cherry：「做乜咁驚呀你，古古怪怪咁，你睇下個風景幾靚。
」 古怪既人係你咋掛？頭先話要送埋Ada上樓。
咦，個景又真係幾靚喎，座山有d霧氣遮住，若隱若現咁。
Cherry：「以後都可以睇到呢d靚景就好啦…」
好普通既一句說話，我聽落格外沉重。
佢係咪有野想暗示比我知？
係咪同我諗既野一樣？
我偷偷咁望下佢隻手，見到佢仲有戴住隻戒指。
我諗呢個係我人生中遇過最大既鼓舞。
好，要上啦！！
「加油啦另一個我。
」 咦？
我又聽到自己把聲，睇黎係我既EGO。
連自己既意識都支持我既行動，今次一定唔會有錯。
我：「Cherry。
」 黎啦黎啦，我終於夠膽開口啦。
Cherry：「做乜吖傻佬？
」 我：「我地…我地一齊左幾耐？」
仆街！唔好lag機吖！
Cherry：「計埋斷開左五年既話，而家都六年lu~你大學都grad左啦~
」 我：「又係吖可哈哈…」
點解我好似個細路咁俾佢玩緊咁既。
Cherry：「咁就六年啦可？而家睇好似過得好快，所有野都好似尋日發生咁。」
我：「你走左果五年我不知幾辛苦吖，一直堅拒誘惑，請左幾個女仔食檸檬。
」 Cherry：「叻啦叻啦，係抵錫既你。
」 話抵錫，但係佢捏我個鼻。
Cherry：「不過so far我地係埋一齊既日子都過得開心吖？唔計空白左既五年既話？」
「無空白左吖果五年。」
Cherry：「嗯？」
我：「呢五年入面，你一直都係我心入面，我一直都好掛住你，所以並無空白架。」
Cherry：「哈哈，咁我都係吖，無空白到，而且…」
「而且早輪我地先重新咁過左我地心目中既呢五年。」
我搶係佢之前講，搞到佢係咁笑。
我：「多謝你，多謝你令我經歷左一段咁開心，咁精彩既青春。」
咦？我無lag機啦喎！仲講左句非預設對白！
Cherry：「嗯，我都多謝你，多謝你出現係我生命入面，令我可以遇上你。
」 我：「咁所以…」
Cherry：「唔？」
我：「我覺得…我地係時候進化！
」 屌！！！我講左D乜吖仆街！媽！好柒吖！
Cherry：「你想講咩吖哈哈。
」 我：「我意思係！我地都經歷左咁多事！都係時候可以更進一步！
」 「我想你嫁比我！我覺得自己已經唔可以無左你！
」 我單膝跪左係度，唔敢望住佢。
哇，終於講左出黎，好似放低左舊心頭大石咁，舒服哂。
我一下子講哂出黎，之後就好似D運動員比賽完係咁喘氣。
而家就睇佢反應啦。
斷估佢唔會拒絕掛..？
Cherry：「你傻架？
」 咦！？？？？
「我地一早簽左結婚通知書啦，我一早就已經決定嫁比你啦。
」 「不過，你肯再同我求多次婚，我真係好開心吖魯路修…」
哦，嚇死我咩屌。
我搖住頭咁抬返起頭望住佢，發現原來佢已經喊到成臉都係，仲掩住自己個嘴。
傻婆。
我企返起身，又一次咁攬住佢，摸佢個頭。
我：「我愛你吖芷睛。
」 Cherry：「我都係，我都愛你吖魯路修…
」 兩個傻仔攬埋一舊咁企係商場平台花園，都唔知會唔會被人po上網。
但係我而家好開心，唔理得咁多喇。
咁就好喇，我要結婚啦終於，我可以結婚啦終於。
跟住就係…