嘛,唔少要準備既野係我出事之前都已經搞掂哂,Book酒席搵律師之類果d都做左。 

我地原先訂左係25/12擺洒,美星有問過我洗唔洗改期,因為而家都已經11月,但我話唔洗。 

之前傾果陣美星已經話要搞大佢,要係一個好大好好玩既Party,所以佢靠老豆既人際關係book左間酒店。 

其實我就無去過果間酒店睇下個宴會廳既,只係佢兩個一味話好正好正,所以我都無咩意見。 

我對「婚禮」其實無乜特別要求,只要大家玩得開心我就夠,所以我放哂手比佢地話事。 



但始終有野係要自己話事既,著乜同請D咩人黎都係自己話事。 

唉,麻煩… 

請D咩人唔係咩大問題吖,反正都係請熟人,著D咩衫先麻煩… 

又要著西裝?我好憎著西裝啊救命… 

可以的話我想著背心短褲拖鞋就算啊… 



不如問下Cherry同美星意見?咁咪唔駛煩。 

我走去Cherry間房,敲極門都無人應我先醒起佢返左去佢自己屋企。 

咁退求其次搵美星啦唯有。 

我:「喂有無人吖。」 

我一邊拍佢房門一邊問。 



「入黎啦我無鎖門。」 

嗱你叫架。 

我打開房門,見到佢係度用緊電腦,左click右click。 

我:「係度搞乜。」 

美星:「design緊衫囉,係你婚禮著。」 

design? 喂救星到啦呢鋪! 

我:「岩啦咁,可唔可以幫我設計埋?」 

美星:「吓點解。」 



我:「其實我呢排都煩緊點著好,一D頭緒都無,我又唔想著西裝…」 

美星:「吓呢D場台多數都係咁著架啦,你又唔係女人要揀婚紗。」 

我:「之前Cherry話要各自準備衫,到時候俾驚喜對方,我就知佢一定會著到好靚,我唔想失禮佢..」 

美星:「屌,你講到咁我都無理由唔幫你啦,見你係細佬咋,講啦想要咩style。」 

我:「我無所謂架,你覺得Cherry會鐘意就得架啦…」 

美星:「又無所謂,咁我俾套校服你算,反正佢一定會鐘意。」 

我:「吓唔好啦..」 



美星:「細佬吖,你要結婚架啦,有d主見啦好無?」 

我:「係既係既。」 

有求於人要低聲下氣是常識吧? 

美星:「家姐幫你話埋今次事,當係送俾你既結婚禮物,但呢次係最後一次啦,ok?」 

佢用老母既語氣同我講,我又無反抗。 

我:「多謝家姐。」 

美星:「嗯,好好期待下啦咁,出返去啦唔好阻住我做野。」 

我:「YES YOUR MAJESITY。」 



我放輕腳步咁向後退出佢房,之後再輕輕力咁幫佢關門。 

呼,咁就搞掂左一件事啦,拜託你啦家姐。

之後就係派請帖…之前就已經派左比最熟既friend,之後就派埋比D無咁熟既就OK喇。 


唔知有無人會肯黎呢… 

畢竟我呢幾年都好少埋堆,突然派帖人地會唔會唔肯黎,以為我只為收人情。 

啊,講起就覺得頭痛。 

咦,我電話響喎,邊個搵我呢。 



原來係老豆,居然會打比我。 

我:「喂搵我咩事。」 

老豆:「喂~食左飯未?未就出黎食啦,我岩岩同你老母返左黎,想見下你地。」 

我:「我未食吖,你等等,我問下美星先。」 

我手執電話拍美星房門。 

我:「老豆返左黎,問你出唔出去食飯喎。」 

「唔撚食吖我而家好撚忙吖屌!」 

噢,睇黎都係唔好叫佢好D。 

我:「喂我諗佢唔出去架啦,我同你地食啦,去邊食?」 

老豆:「咁去茶木啦,一陣見。」 

我:「OK。」 

咁就收左線,我亦換衫出去。 

好似都有一段時間無見過佢地,對上一次係幾時我都唔記得左喇。 

上次同Cherry入去大澳行令我諗起細個同佢地去,當時真係好細個,玩得好開心。 

只係一眨眼,我居然都要結婚喇,時間過得真係快。 

唔知我同Cherry第時會唔會有仔女呢?如果有既話,我一定要帶佢地去大澳至少一次。 

「喂~呢邊吖魯路修。」 

咦原來佢地已經到左。

我:「阿爸阿媽。」 


媽:「身體點吖?」 

我:「無事好耐啦,行得走得。」 

老豆:「唔,下個月結婚啦準備成點。」 

果然係為呢件事。 

我:「大部分野係之前已經準備好,衫果邊美星就話會幫我整,當係結婚禮物。」 

老豆:「幾好幾好,你結婚老豆我真係好開心。」 

咦,做乜無啦啦玩感性。 

老豆:「以前因為做野我同你阿媽好少係你身邊,成日得你自己一個,老實講我都怕會影響到你性格。」 

老豆:「無係你身邊陪你大我真係好內疚,連你中學大學畢業我都去唔到,真係好慚愧。」 

「好彩你而家搵到你既另一半,搵到你既屋企人,咁我都可以安心D。」 

我:「屋企人我一直都有吖,就算唔計Cherry。」 

老豆:「嗯?」 

我:「我一直都覺得你地一直都係我身邊吖,周不時我會諗起你地,咁咪夠。」 

老豆:「衰仔用氹女D招數黎氹老豆都有。 」 

佢一邊笑一邊捽我個頭,我無反感,反而有少少開心。 

細個果陣佢都成日咁整我,尤其係讚我果陣。 

我忍唔住露出笑容。 

我:「爸,我做到啦,你叫我唔好放走佢,我做到啦,佢以後都會係我身邊架啦。」 

老豆:「嗯,做得好吖魯路修,不愧係我既乖仔。」 

佢開始更用力咁捽我個頭。 

媽:「咁戒指呢?戒指你買左未? 」 

仆街啦!完全唔記得呢件事添!成日凝住有而家隻戒指就夠! 

結婚戒指吖!!