被踢回人間的天使: 9.有緣無份

9.有緣無份

「你洩露天機佢知，佢就要即刻上天堂報到架啦，所以我勸你都唔好同佢講…..」月老喘著氣說。

「我見到佢咁掛住我，我真係忍唔住…..」李桐忍不住哭著說。「我第一次咁強烈感覺到劉琪咁我愛，咁需要我…..我好想話佢知，我就係李桐，就係佢日思夜想嘅李桐…..」

「你已經死咗架喇，嚴格嚟你已經唔係李桐，你同佢講，佢唔會認得你，又唔會信你，所以算喇。」月老安慰李桐。「天意有時都控制唔到架…..」

「咁點解要比我見返佢，又要我再一次失去佢….」李桐十分憤怒的吼叫著說。



他的憤怒、他的無奈心情根本沒有人會明白。李桐覺得所有的事也是身不由己，他根本不想成為天使、更不稀罕獲得回人間的機會。如果沒有這一切一切，他可以心安理得的去投胎轉世，而不用面對眼前的失落和無助。

「唉….只能夠講你同嗰個女仔有緣….因係定數，緣係變數。今日佢同你有緣再見，都係前世嘅因。緣有善有惡，斷絕惡緣、惡果無緣而生。努力修善緣，善果自然會來。係善果定惡果就睇你今日嘅決定喇….」月老語重心長的拍拍李桐肩膀說。「你乖乖地幫我手，完成任務就返去天堂啦，好唔好？」

李桐拭乾眼淚點點頭。

「如果我識分翻開啲人，英文又好啲，都唔駛你幫手。你教我識分晒啲人呀，字呀，就可以返上去….」月老說。「你係人間都係住劉琪到先啦，我嗰度冇地方你住呀……..一陣你去買部手機，我有事會微信你……」

「微信你都識，好潮喎月老…..」李桐估不到月老也會用手機、微信等高科技產品。



「習大人叫到唔做，想被軟禁咩….」月老稍稍地跟李桐說。「好喇，你醒咗就去出手機啦…..」

李桐慢慢地醒過來，發現自己仍在許留山。他看到劉琪擔心的看著他。

「你終於都醒喇….你講講吓野就暈咗，我以為你咩事。後尾聽到你扯鼻鼾先知你瞓咗…..但叫極都唔醒…..你冇事嘛….」劉琪緊張得拉起李桐的手，嚇得李桐馬上把手縮回。李桐不想因為自己而令劉琪得到惡果，寧願與她保持距離。

「冇….突然眼瞓….渴睡症發作…..」李桐胡亂地說，以轉移視線。

「冇事就好喇…..你瞓咗咁耐，我唔太好意思，所以叫多咗兩杯野飲，依加勁急。去完洗手間就同你搵親戚丫…..」劉琪坐立不安的說。李桐此時才發現檯上多了兩杯飲料，即劉琪一共飲了三杯粒燈芒果爽，難怪她會內急。李桐為一次又一次麻煩了劉琪感到十分不好意思。他很想快點完成任務回去，免得增加劉琪的煩惱。



「唔駛搵親戚住，不過，我想出一部手機先。之後先再搵佢地。」李桐說。

「我屋企有手機可以借比你用…..咁不如一切返我屋企先…..」劉琪說。

在回家的途中，李桐和劉琪也沒有說話。那種尷尬的氣氛緊緊籠罩著他們。李桐不敢說話，害怕說多了會影響劉琪。

李桐很清楚他和劉琪已經無法回到從前，他們確實已經分道揚鑣。在這個世界上已經沒有李桐這個人。他認為保持距離是對劉琪最好的，至少當他完成任務離開的時候，不會再次成為劉琪內心的刺。傷口已經癒合了，為何又要被挖開呢。雖然李桐很想再次擁抱劉琪，但想到最終只會成為痛苦和失落時，倒不如將美好的回憶收在心裡，還能獲得一絲的甜蜜。

「電話係電視機櫃，你自己搵下，我去洗手間先…..」劉琪說完連跑帶跳的走入洗手間。

李桐於是在劉琪所說的位置尋找，竟讓他找到自己生前所用的電話。李桐急不及待打開電話，自己的FB、Wtapps、Email仍然在運作中。

他不停翻閱久違的FB，看到自己最後的Status是「今晚將會是最重要的一晚」。他完全想不到這句說話竟然成了他的遺言。然後是一版又一版的留言「RIP」、「點解你咁早走，安息喇，兄弟」、「你應承過會做我伴郎架，又話去巴西睇奧運，下一世我地要一齊去睇…..」、「願你到一個沒有痛苦、沒有傷心的地方，一路好走…….」，這些都是李桐死後，他的朋友和親友留在他FB的說話。他看到朋友的不捨、親友的難過。李桐想起了妹妹，連忙翻看她的FB。

「哥，你點解咁快就走，我好掛住你…..」


「哥，你欠我好多野未還喎…..」
「哥，你有時間就報夢比我啦，我有野想同你講…..」

他想起自己以前說過要做的事。他想起應承爸媽往九寨溝旅行、想起應承妹妹把家中的牆壁重新油一遍、想起應承爸媽到影樓影全家福...…但所有應承的事，也被李桐推遲了。「今個星期約咗朋友」、「公司好忙，請唔到假…..」、「我想瞓多陣」、「下星期先啦」、「下次先啦」…....原來已經沒有「下次了」。李桐以為還有很多時間，卻發現時間不會因為你未完成的事而繼續走。當時間一到，一切也會停下來，也不會再有「下次」。

全家福永遠也不能完整無缺，一切也不能重來。李桐此刻心如刀割般，淚水又忍不住留下來。

一切也不能重來.....

「嗰果係我男朋友嘅電話…..」劉琪不知何時站在李桐身後。

「點解你仲Keep住佢電話嘅？」李桐偷偷拭去眼淚說。

「佢離開咗我，唔代表要將佢所有野都Delete。佢嘅電話、FB、Email都係佢存在過嘅證據。我唔捨得就咁刪除…..入面全部都係我同我男朋友嘅回憶。我一直Keep住個電話，就係想保留所有回憶，我好怕我有一日會忘記咗佢，會唔記得佢個樣，我唔想連小小嘅記憶都冇埋。我知道佢都想我記住佢、掛住佢…..」劉琪傷感地說。



看到劉琪仍然放不下自己，李桐又再次心痛起來。他心痛劉琪一直也放不下自己，心痛她不願意把傷口癒合。

「佢唔值得你咁掛住佢…..」李桐說。

「值唔值得只有我知…….你唔識佢，你唔好咁樣講佢….我心裡有數…唔駛外人加把口....…」劉琪連珠炮發的責罵李桐。李桐重來沒有被劉琪責罵，或許是因為李桐刺中了劉琪的傷口，惹起劉琪的痛。

「借你用嘅電話係依度。」劉琪搶回李桐手上的電話，再給他另一個電話後，頭也不回的走進房間了，只剩下李桐在客廳。

「唉……點解要比我返嚟人間呢…..根本錯晒…錯得好離譜.....」李桐無奈地嘆氣。

突然間，李桐手上的電話響起訊息鈴聲。

「你快啲幫我查下咩係BBL，月老字」

BBL？Boy，Boy，Love？