被踢回人間的天使: 10. 愛是.....

「BBL….」李桐完全摸不著頭腦。他想B應該是指男生（Boy)， L應該是指愛（love），所以BBL應該是指「男生與男生的愛」，即是代表「Gay」。

李桐將答案回覆月老。「BBL是代表Gay呀」。

一會兒，月老回覆他的訊息「她們都係女仔，衣著比較中性化，但係點睇都唔似男仔喎」。

看到月老的回覆，李桐更加迷茫。B不是代表Boy，那麼應該代表甚麼呢？此刻他想請教劉琪，但又怕被麻煩了她。所以他選擇利用手機上網找答案。

BBL＝Be Back later（稍後回來）、Broad Band Light（脈衝光）、Bye Bye Love…..時間一分一秒的過，李桐也找不到合適的話字，他選擇放棄了。



「月老，我都不知道呀....」李桐回覆月老說。

「你都唔知，我更加唔知。近來，我被G呀，P呀，LGBT搞到亂晒，咁嗰兩個BB女仔，應唔應該比姻緣紅線佢地呀.....」月老回覆說。

「咁如果佢地真心相愛，就比啦。我估同異性戀冇分別嘅，愛就比架啦，但上頭點睇？」李桐回覆說。

「習總比咗8隻字：順應天命，順其自然....我估應該代表批准掛....但我唔太肯定BBL得唔得....你再幫我查下啦...」月老回覆說。

「唉…..究竟咩係BBL呀…..」李桐嘆了一口氣說。



「即係TB同TB拍拖呀……」劉琪突然在李桐身後出現，把李桐嚇了一跳。「你做咩問BBL呀，唔通你想追TB？定有TB追你？」

「冇…冇人追....作為TB嘅我….都要與時並進，了解下潮流興咩戀愛關係……因為我鄉下就冇咁嘅情況嘅…..你可唔可以解釋多少少比我…..」李桐結結巴巴的說。作為男生的腦袋，他明白TB指是女孩子但衣著和性別上男性化。兩個TB在一起是否等於男生「搞基」呢。李桐想像不到BBL的畫面。

「唉....啲人成日就喜歡將人分類。BBL好簡單，就係兩個女仔鐘意對方囉…..其實鐘意未得囉，我都唔明點解要有咁多標籤。就係標籤將人框死晒，然後又用標籤去歧視人地。點解TB一定要配TBG？Pure一定要配Pure？講嚟講去，未係女仔鐘意女仔囉，駛乜咁複雜。」劉琪忿忿不平的說。

「係…..」李桐仍未弄清楚BBL是甚麼，劉琪又說了兩個艱深的詞彙「TBG」和「Pure」，令他更加感到吃力。「其實呢…..我想了解多啲依方面嘅野，可以係邊度搵到？」

「我都唔知得太清楚，幫你問下朋友啦…..」劉琪拿出電話傳訊息給朋友。不消一會兒，她的朋友便回覆她。「嗱，朋友話Les嘅呢，可以上Butterfly App。Gay呢就上Circle同Dicky…..我朋友話Butterfly好多野睇……仲可以識女仔，啱晒你…..」



「我唔係係女仔都鐘意架…..我…..我有一個我好愛嘅人…..只不過，我地唔可以一齊….……」李桐看著劉琪，看著那個他一生中最愛，卻無法在一起共度一生的人。

「點解呀？因為佢係鄉下，而你係香港？Long d好平常之麻，好多人都係咁啦….long d都可以修成正果架…..」劉琪繼續追問下去。

「我地係兩個世界嘅人，我鐘意佢，但係佢唔知道….算啦…..係呢，頭先對唔住呀，我咁話你男朋友。你男朋友知道你咁愛佢，佢一定好高興。不過，我估佢都想你放低佢嘅….」李桐的心又再隱隱作痛。說服對自己最愛的人放下對自己的思念和愛，是一件很痛苦的事。但李桐亦知道如果劉琪一直放不下，她一輩子也不會得到幸福。

「談何容易丫，又唔見你放低你鄉下女友…..感情事，緣份嚟嘅。我覺得我已經用盡所有嘅緣份去得到我男友對我嘅愛….….」劉琪嘆氣地說。「愛上一個人或者只需要一日，但要忘記一個人，係要一年。要忘記一個愛自己，而自己又愛的人，係要一世架。」

李桐看到劉琪眼中的掛念和哀愁，讓他深深感受到那種愛上卻不能愛。忘了卻忘不了的感覺。

「唔會架，你一定會搵到個愛你嘅人架…..」李桐捉著劉琪的手說。

「只要我求下月老，佢應該可以幫到手.....」李桐在心裡暗暗決定回天堂之前，一定要為劉琪找到一個愛她一生一世的另一半。

「月老，今次靠你喇!」