早兩日OT遲收工,女上司叫我上去佢屋企..: 24

星期一, 番工,
呢份番左兩年既工, 第一次番得咁不安,
行到入去坐低, 每個同事既眼神好似懷疑緊我咁,
我呼左啖氣, 照常hea一陣先做野,
點知突然間有幾條友大叫: 阿冷!!叻仔喎!!!咁大張單都俾你簽到!!!
我呆左一呆, 諗起同Angela夾定既口供 : 邊係, 係Angela把口勁...
 
嗯嗯...佢把口的確係勁既....咳咳...
 
我應付著呢d平時同我傾計都嫌煩既同事,


忽然見到Jenny企係Angela隔離,眼定定咁望住我,
突然間冷汗直流, 我冇同Angela申報, 又冇同Jenny夾定口供,
如果Jenny問Angela我既事, 又話姐Angela突然知道我同Jenny撞過面,
咁咪仆街?....
 
當我胡思亂想既時候, 突然間有人拍我肩頭
"喂,阿冷, Angela叫你喎"
 
我抬起頭, 見到Jenny望住我, 而Angela不停咁check緊文件.
我戰戰兢兢咁行過去, Angela望都唔望我, 就遞左份文件俾我:


"台灣個客改左d款項, 你幫我打番落電腦到, 再send俾老闆簽收"
 
我話好, Angela仍然冇抬起頭,再用不大不小既聲線:
"阿冷, 今次簽到約, 你幫左我好多, 我會同老闆講聲 ,希望我地以後有多d合作機會"
 
其他同事都議論紛紛,唯獨我一路聽一路動魄驚心.
如果Jenny突然間問一句, 我可以直接收皮.
 
但Jenny冇, 佢只係默默咁企係隔離, 聽著, 點頭, 抄低Angela講既野, 再對住我微笑.
 


無驚無險坐番埋位, 無驚無險食Lunch,
正當我諗住照平時一個人去食m記,
Jenny突然間閃埋黎 : 阿冷~出唔出去食飯呀?
我: 出啊...
Jenny: 今日班sales出哂去見客, 冇人同我食飯呀, 不如一齊呀!
 
我下意識望去Angela個位, 發現冇人係到,
我呼左一口氣: 好呀, 但我去食M記喎
Jenny: 冇所謂呀,你食咩我都食
我: 咁我去食屎.
Jenny: 我食你果d, 你食我果d囉.
我:....
 
對著呢個女仔, 我真係投哂降.
 


M記, 食食下, Jenny突然間講: Angela真係好好呀
我: 嗯?...
Jenny: 你咁都唔明!? 佢唔想你係咁多同事面前瘀皮, 專登話你都有去台灣幫佢手呀! 你呀, 得閒應該要請Angela食飯....
 
我笑左笑, 點點頭.
 
同Jenny傾計最好既地方, 係佢會自動腦補人地說話,
直到最好,最合情理為止, 令我根本唔需要解釋咁多.
 
食完lunch, 番公司做多一陣野就收工, Jenny又閃埋黎: 阿冷~今日派唔派飯呀?
我嚇左一跳, 再望一望Angela個位, 好彩佢好似仲出緊去見客:
"我番工都唔得閒煮飯喇....唔派喇...."
 
Jenny: 冇所謂, 咁我煮囉!
我諗左陣, 最後都係點頭應承左.