之後既日子, 好似真係恢復以前既生活,
但唯一唔同既係, 我身邊多左Jenny,
食Lunch, 放工派飯, 見佢既時間,
幾乎仲多過見我老豆老媽子...
當然仲多過Angela.
 
Angela似乎非常忙碌, 比以前更少留係公司,
有幾次我想同佢傾計, 但佢都對我好冷淡,
望住我既眼神, 好似陌生人咁
我不禁係到諗, 到底我地既關係,


係處理完Martin既時候,係咪已經完滿結束?
係好事...定係壞事....



"國際富商馬田田失蹤接近一星期, 音訊全無 , 警方暫列為失蹤人口處理..."
 
食食下lunch, Jenny突然間讀呢段新聞出黎,
嚇到我幾乎將熱朱古力噴哂出黎.
 


Jenny若有所思咁托住個頭: "嗯~唔知佢間公司d股票會唔會大跌呢?"
我幾乎再噴朱古力出黎, 呆左一呆, 隨之釋然,
公司裡面好似冇乜人知道Angela既老公就係佢...
 
我忍住啖朱古力, 扮哂若無其事咁繼續食飯,
呢件事, 終於曝光....
 
我有一剎那想打俾Angela, 問佢知唔知呢件事,
問佢點算好, 問佢有冇事, 但我始終都冇打到.
 


食完Lunch, 番公司, 又放工, 準備去派飯,
同Jenny並肩而行, 望住佢既側臉, 突然間衝口而出:
"我今晚唔去派飯喇"
 
Jenny一臉疑惑, 我再講: 我想約個女仔睇戲.
 
Jenny呆左呆, 似乎閃過一絲失落, 但即刻好八卦咁:
"邊個黎架? 靚唔靚女架? 佢係點架? 快d講俾我知!!!"
 
我: 嗯...識左冇耐咋, 都幾靚既, 性格...係我鍾意果類型.



Jenny窒左一窒, 突然間行得勁快:
 


"你個阿冷丫, 真係唔夠義氣呀, 同你咁fd都唔同我講囉! 咁好啦...
我今日就批准你派少一日飯, 你同佢睇得開心啲啦, 丫唔係喎...
你都未約佢, 咁我...我祝你約到佢啦, 我諗d女仔會鍾意睇功夫熊貓...
雖然我都有d想睇, 但都係算啦, 你睇完記得話我好唔好笑喎...
我...我一個人派飯都ok架喇..."
 
Jenny行得愈來愈快, 又一輪嘴講野, 我根本插唔到嘴,
我最後唯有企係到, 大聲咁講 : 我想約你睇戲呀!
 
Jenny頓時收聲, 但又冇另轉頭 , 過左一陣, 佢好細聲: 吓?
我: 我話我想約你睇戲.
 
Jenny仍然冇另轉頭 : 咁...咁邊個派飯呀?
我冇回答, 慢慢行到去佢後邊, 輕輕咁摟住佢, 係佢耳仔邊: 食少日, 唔洗死既
 


Jenny: 咁...咁邊個買飛呀? 去邊到睇呀? 而家去會唔會趕唔切架? 呀, 功夫熊貓好似好低b, 你會唔會唔鍾意睇架? 仲有...
 
我一下子托住佢下巴, 重重咁錫左佢一啖, 阻止佢既喋喋不休.
"睇咩戲唔重要,最重要既係你係我身邊...."
 
Jenny臉都紅哂, 好溫馴咁點點頭, 將個頭埋係我懷中, 冇再出聲.
 
忽然間, 我諗起Angela,
如果唔係佢, 我唔會識到Jenny,
如果唔係經歷左咁多事,
我唔會有膽量咁隨意做呢d事, 講呢d說話...
因為Angela, 先會有Jenny.
 
果日之後, 我同Jenny就成為左男女朋友.
呢次係我25年黎既第一次拍拖,


我好興奮, 好開心, 連續幾晚都訓唔著,
老豆靚仔左, 老媽子瘦左, 就連安九果班露宿者, 都變哂天使咁款.
 
我唔單止恢復以前既生活, 甚至比以前過得更好,
一切, 都似乎好順利, 殺人滅屍甚麼的, 好似完全冇發生過
直到一個訊息.
 
"有事,晚上見."