【自殺之後，我遇見死神小姐】救贖七個自殺者的故事: 終—(54)
一道白光映入我眼中，我一張開就望到白芒芒嘅天花板，同埋模糊嘅身影喺我隔離。
「醫生！病人終於醒啦！」隔離嗰個女人喺度大叫。
呢度係醫院？我望下周圍，再望下自己，呢度的確係醫院，我而家瞓咗喺張床上面。
但係……我唔係應該死咗嘅咩？
我最後嘅記憶，停留喺同妹妹拖住手，喺碼頭觀望住無際嘅漆黑大海，然後我哋一同化作光點，然後就失去意識。
我……係咪發緊夢？我摸一摸自己嘅手，感受到真實嘅觸感，我再伸手搣一搣自己塊臉，係真實嘅痛感！
不久，就有個醫生入嚟同我檢查。
「呢度係醫院？我重在生？」我問醫生。
「呢度梗係醫院啦！唔通天堂咩！你無死到呀，不過你都算好彩，咁高跌落嚟，都只係全身多處受傷，腦震盪兼內出血，前額、盆骨同左腳骨裂，而且康復進度十分快，基本上都好返七八成，簡直係奇蹟。剩低嘅就係要做次詳細檢查，睇下個腦有無事，同埋你睏咗好耐，要做返物理治療。」醫生一邊檢查一邊講。
「我睏咗幾耐？」
「兩個月到。」醫生平淡地講。
兩個月……？原來離我自殺至今，已經過咗兩個月。
我唔明白點解我會生存落嚟，同埋……既然我無死，點解我會遇見死神小姐，然後進行救贖自殺者嘅任務？
喺救贖任務中，我只係經歷咗七日嘅時間，但醒返之後被告知已經過咗兩個月。
一切事情太唔吻合，我無法解釋一切事情。唯一知道嘅係，事實擺喺我眼前，我依然活著。
「呢個現象喺經歷生死一線之間嘅人係好普遍。有人會進入人生走馬燈，回憶返自己過去嘅人生經歷；有人會靈魂出竅，去見自己最重要嘅人；有人去咗個異空間，見識到好多千奇百怪嘅事物。呢個情況其實係昏迷嘅時侯，大腦仍然活動，因而混亂而所產生出嚟嘅影像，當然有人會講係以科學解釋唔到嘅事情，但呢啲講法無實質證據，但終歸到底，呢啲記憶會慢慢淡忘，你就當係一場夢。」醫生同我講。
「我做咗護士咁多年，都聽過唔少類似嘅病例……不過幫其他自殺者完成心願，而且重要係認識嘅人，呢種病例我反而第一次聽。你有無聽過佛洛依德嘅理論？佢對於夢嘅睇法係認為夢係我哋嘅潛意識，喺你昏迷緊嘅時侯你嘅大腦依然會活動，而有可能你潛意識認為你有負於佢哋，耿耿於懷，所以就做咗個咁嘅夢去安慰自己，減少自己嘅罪惡感。」有個年紀比較大嘅護士同我講。
我留院觀察一個禮拜，做完詳細身體檢查，同簡單嘅康復治療之後，就出咗院。
喺我出院嘅路上，我依然無法忘懷嗰七日嘅一切經歷，唔通……所有嘢都只係場夢？
我回想起救贖自殺者嘅事情……回想起佢哋嘅經歷同苦衷，回想起佢哋對塵世遺留低嘅心願，回想起佢哋實現心願一刻所露出嘅喜悅，以及流下嘅眼淚……所有嘢都太真實，根本無可能係假……
我無法相信只係一場夢。
為咗求證一切，我馬上去到學校，假若能夠從同學口中求證到Cathy同阿Yan自殺嘅事，就可以證明一切都係真！
但當我去到學校門前，我見到阿Yan從校門出嚟，阿Yan依然保持住瀏海遮眼嘅髮型，佢身邊重有個男仔同佢同行，係阿朗。佢哋之間彷彿無發生過任何事一樣，有講有笑咁離開學校。
事實無得我唔相信，阿Yan並無自殺，佢就活生生企喺我面前。
一切都係場夢……？
但係，感覺實在太真實，完全唔係一場夢。最重要嘅係——
我同妹妹之間所有嘅事情絕對唔係一場夢！佢為我做過嘅事情，佢為我流下嘅眼淚，佢一直以嚟對我嘅感情，佢對我講出嘅心底話，重有……到最後一刻我同妹妹緊握手望住我哋嘅希望之地，呢一切都係真實！
直到而家，我仍感覺到眼淚濕潤嘅感覺……無錯，所有事情係真實，經歷過囓一切都係有血有肉，絕不虛假！
『喂！你喺度苦惱緊啲咩呀？』熟悉嘅聲音傳入我耳中，我即刻擰向聲音嘅來源，係死神小姐！
死神小姐一如既往飄喺空中，用不屑嘅眼神望住我。
『你唔會以為，你之前經歷過嘅一切都係假呀嘛？』死神小姐笑住講。
「但點解，阿Yan會生勾勾喺度？」
『呢一切都係你嘅功勞，因為你所做嘅所有事情，給予佢哋生存嘅希望，所以佢哋無死到。定係，你好想人哋死？』
「咩意思？我唔明白。」我反問。
『自殺輪迴，其實唔係對自殺者降下嘅懲罰，自殺本來就無分對錯，點解自殺一定要係罪孽，要得到咁大嘅懲罰？』
「咁……我所經歷嘅一切究竟係咩？」
『自殺輪迴係嗰啲對世界失去希望，一心尋死但未能完全死去，滯留於生死之際嘅自殺者，最後最後嘅選擇「生」或「死」嘅機會。喺自殺輪迴中，自殺者會感到自殺時肉體上嘅痛苦，以及望住留於世界嘅遺憾時精神上嘅痛苦。如果佢哋經歷咗自殺輪迴之後，仍然決心尋死嘅話，我哋就會將佢哋嘅靈魂帶離呢個世界，反之如果佢哋再次擁有求生意志嘅話，我哋會賦予佢哋再一次嘅新生命。』
死神小姐將視線望向阿Yan，『但要再次獲得新生並不容易，關鍵在於勇氣與決心。只要擁有對再一次生存嘅勇氣，以及親手彌補遺憾嘅決心，先會得到死神特賜嘅新生命喔！不過……』
「不過咩？」
『呢一切，因為你嘅出現而改變，你介入咗佢哋嘅自殺輪迴，引導佢哋尋找希望嘅方向，為佢哋彌補留於世間嘅遺憾，所以佢哋先會得到新生嘅機會。』
死神小姐指向天空，天空只有一片蔚藍色嘅天空。
『死係一件好容易嘅事情，但身處於絕望不堪嘅世界，生存落去係更加難嘅事情。如果擁有覺悟嘅話，話唔定會有奇蹟出現呢！人類唔係一直都係咁嘅咩？』
死神小姐講得好啱，人類就係一種咁嘅生物。我哋同畜牲唔同嘅地方係除咗會滿足生理需求，我哋重會識得相信。面對空白一片嘅未來，對前景感到迷茫困惑，但我哋一直相信，相信奇景會降臨喺我哋眼前，所以我哋先能渡過每一日生活。
「既然有自殺輪迴呢個機制針對自殺者，點解作為自殺者嘅我要去救贖自殺者？同埋……我想知道被我救贖嘅人係咪全部都重在生……？」
『佢哋全部都因為你嘅救贖，所以得到再一次生存嘅機會……』
我無等死神小姐講完，即刻問：「咁我妹妹呢？佢喺邊度？」
『好遺憾，你妹妹已經死去，你再見唔到佢。』
原本我以為能夠再次見到妹妹，但死神小姐卻同我講呢個答案。
「點解……？你唔係話所有自殺者都已經被我救贖，得到再一次嘅生命咩？點解！點解我妹妹會無再一次嘅生命？」
『呢個係我嚟搵你嘅原因，義務上我應該要告知你實情。』
周圍嘅景色開始變化扭曲，學校以及原本嘅景色漸漸消失，取而代之係另一個景色。
係……我哋屋企樓下？
『其實我之前有多番向你暗示過，不過你無意識到。而家我會話你知所有事情嘅起因，包括點解你會得到救贖任務，以及……』
『關於你妹妹嘅一切真相。』