喺一個紛亂嘅工作室入面,Chris研究緊Veronica交托畀佢研究嘅資料。
 
Chris運動一下自己條頸,輕輕拍打幾下後背。佢嘆咗口氣,起身走去咖啡機嗰度,㩒個掣沖咖啡。
 
「滋」一聲,咖啡沖調完畢。雖然只係即沖咖啡,但依然氣味芬芳、令人醒神。
 
佢拎起杯慢慢啜咗一啖,眯埋眼思考。
 
Chris突然張開眼,快步走番到電腦臺度,放低杯咖啡,手指飛速喺鍵盤上敲擊。
 




電腦主機連接住Veronica畀嘅嗰部手機,部機應該屬於廖家豪嘅。如果破解咗手機密碼,入到去就好可能搵到新嘅證據。
 
一時間,工作室只聽到Chris手指敲落鍵盤嘅聲音,密如聯珠。
 
“Yes.”Chris輕輕握一握拳,對自己講。
 
Chris呼咗口氣,拎起身杯咖啡,一路用破解到嘅密碼解鎖廖家豪嘅手機。
 
佢一路睇,一路㩒。
 




「潑!」Chris突然將口入面嘅咖啡噴曬出黎。
 
佢身體微顫,喺度喘氣回神。
 
等咗陣,Chris先將目光重新放落廖家豪嘅手機度,佢皺住眉頭,覺得不可置信。
 
*************************************************************************
 
「人生於世上~」
 




瞓到中午先識起身嘅岑世英落街買咗個排骨飯,吊住袋飯行番偵探所。
 
難得呢排個有錢女冇咁黐線,冇再日日走去和合石「陪Derek」。諗到呢點,岑世英心情都好番曬。
 
當佢行番入偵探所嗰陣,見到阿tim同阿john企喺門口,就知道佢地嘅小姐都返咗黎。
 
岑世英推開道門,見到Veronica果然返咗黎。對方好專心咁睇緊一部手機。睇真啲,正正係自己喺廖家豪嘅公事包搵出黎嗰部。
 
「喂!咁早返嘅?有料到嗱?」岑世英放低佢袋排骨飯喺臺面。「查到廖家豪部手機入面有啲咩未?」
 
Veronica揸住部手機問:「畀你睇下?」
 
「好。」岑世英拆緊佢袋排骨飯,不經意咁答。
 
Veronica㩒咗幾下部手機,伸部手機過黎。




 
岑世英拎咗盒排骨飯出黎,接咗部手機黎睇。赫然入目嘅竟然喺一啲血淋淋嘅人體殘肢,極度重口味,岑世英見到差啲想嘔出黎。
 
「屌你老味!咩黎架?」岑世英按住自己心口,意欲作嘔。
 
Veronica講:「殘肢,應該係人嘅。」語氣出奇嘅平靜。
 
岑世英抱怨:「黐撚線,我仲諗住食排骨飯架?而家仲叫我點食?」
 
「hey!我問咗你,你話睇架喎?」Veronica理直氣壯咁反駁。
 
岑世英只係搖頭,一臉不可置信,冇講野。
 
「估唔到你麻麻甩甩,仲細膽過女人。」Veronica望咗望岑世英,語帶諷刺。
 




「屌。」岑世英諗唔到講咩去反擊,不過確實好奇怪:點解個有錢女好似唔驚咁?
 
「喂」岑世英問:「你點解可以咁平靜架?廖家豪手機有啲咁恐怖嘅相…莫非…你早就知道佢…?」
 
「冇可能。我…我唔準你咁講佢。」Veronica語帶悲傷。「我只係…我只係親眼見過真嘅…」明顯指之前放喺佢床嗰度隻斷手。
 
「喂,唔使咁喎。我信你。」岑世英見到對方嘅樣,走過去拍拍肩頭,安慰佢。
 
Veronica只係拋出一句:「好熟呀?」講到岑世英立時縮手。岑世英只係擺擺手、皺眉頭,做個“WTF” 嘅表情。
 
「都冇乜可能喺廖家豪隊冧完人然後影低自己罪證,冇乜理由咁戇居殺完人將罪證收埋喺自己部手機。」岑世英喺度分析。「同埋廖家豪好似喺法國嗰陣受到恐嚇?係咪?」佢望向Veronica。
 
「唔止喺咁。」Veronica低頭回憶。「佢去法國之前,我地喺機場分別嗰陣,佢好似都係驚某啲野。佢冇講係啲咩,不過佢嘅表情呃唔到我。」
 
岑世英聽完,拎支煙出黎,點著佢黎食。盒排骨飯佢已經冇掂到,亦冇打算去掂,所以做厭惡性職業嘅人做完野都食得落飯,實在喺不世出嘅奇能。




 
岑世英講:「咁樣嘅話,基本上手機啲人體殘肢相喺廖家豪做嘅可能性,可以排除。所以,佢之所以放啲重口味相上去,應該係因為佢影低某個人嘅罪證。而嗰個人因為呢個原因追殺廖家豪,令到廖家豪深感擔憂。」
 
「點解Derek最尾喺香港出現?明明佢最尾喺法國失蹤。」Veronica問。
 
岑世英諗咗諗,講:「有冇聽過孫中山喺倫敦畀清朝老笠?孫中山嗰時同樣畀人追咗入清朝大使館,不過就好好彩,最尾走番出黎。我諗,廖家豪最尾喺畀人從大使館運番香港。唔好唔記得,我喺大使館搵到佢啲野。」
 
Veronica望咗眼岑世英,有啲疑惑:「估唔到你做廢青都讀過下書。」
 
「屌你啦!大把後生嘅臥虎藏龍!」岑世英即刻反擊,噴住口煙,但對方不以為忤。
 
「你要知道,兇手應該係一個有財有勢嘅人。」岑世英呼口氣。「叫得郁中國大使館,又收買法國酒店,又將廖家豪由法國捉番香港。呢啲野,唔係大粒野做唔到。」
 
「會唔會…個人喺法國對Derek落手?」Veronica問。
 




岑世英望咗眼Veronica,講:「唔會。冇乜理由殺咗人先再千里迢迢運番香港。一黎冇意思,二黎會更加容易引人懷疑。」
 
Veronica問:「你嘅諗法係…?」
 
「從廖家豪去完比華利會所之後即刻離開香港,同埋我去調查完比華利會所之後接二連三嘅恐嚇同襲擊,相信兇手就係比華利會所嘅人。」岑世英撓撓鬚根。「如果結合埋公司嘅權力恩怨,同埋目前調查,我會講係…」
 
「陳耀華。」Veronica幫岑世英講埋。
 
岑世英點點頭,覺得一啲都唔出奇,因為結合所有野黎睇,陳耀華只有從可疑變到更加可疑。
 
Veronica問:「咁你決定去查陳耀華?」
 
「係。」岑世英講。「我等下就搵人。」
 
佢食咗啖煙,突然諗起身一啲野,同Veronica講:「喂,盒排骨飯,你食唔食?」
 
Veronica只係望咗一眼,講:「我唔食垃圾。」
 
「超。」岑世英嗤之以鼻。「你呢啲有錢女唔識野。」
 
*************************************************************************
 
是日夜晚。
 
警署。會面室。
 
「嗱。證據。」岑世英遞咗一個文件夾畀張德明。
 
「屌,搞咩搞咁夜。搞到我冇精力玩你就好野。」張德明按過文件夾,一路怨言。
 
岑世英指指個文件夾。「喂,重要呀嘛。咁梗係有料到即刻畀你啦。而家有證據,快啲幫我查。」
 
「好!睇個~」張德明抽出文件夾嘅內容黎睇。
 
岑世英諗住阻止佢老友咁衝動:「喂!咪住!」
 
但已經遲咗,張德明已經睇咗。
 
「喂!屌你老母呀?」張德明放低咗壘野:一堆殘肢同內臟嘅相,由廖家豪手機提取再印出黎。「黐撚線架?搞咩呀?」
 
岑世英苦笑:「喂,我諗住阻止你架,不過你太過快。我之前都中過伏啦,你中下都只不過同甘共苦姐。」
 
「屌啦!因住你老友我遲啲有創傷後遺症,起唔到機!」張德明揮拳想打咁款。
 
岑世英拍埋手掌:「咁咪仲好,唔使再對阿嫂唔住。」
 
張德明睥咗佢一眼:「屌你!」然後再睇一次啲重口味血腥相。
 
「喺邊度得黎?」張德明問。
 
「廖家豪嘅手機。」岑世英講。
 
「你嘅諗法係咪同我嘅一樣?」張德明睇咗睇再望佢死黨。
 
岑世英講:「長洲失蹤。」
 
張德明深呼吸一下,問:「莫非長洲失蹤嘅人,就係咁嘅下場?畀個黐線嘅殺咗分屍?」
 
「而陳耀華好可能就係呢個人。」岑世英補充。「所以而家更加要查佢。」
 
張德明望住佢老友,諗咗一陣,點點頭講:「得啦,我會再同阿頭講。今次有埋證據,好難再話唔查。」
 
岑世英講:「有野電聯。」
 
講完,岑世英同出面等嘅阿強落樓,兩個人一齊離開警署。
 
「大佬,呢排係咪會好危險?前排先有人襲擊你,而家仲要查陳耀華咁大料野?」阿強問。
 
岑世英拎支煙放喺嘴,點著佢。佢望咗眼保鑣,講:「遲啲你就明,有啲野雖然擺明係屎,你都要頂硬上。
 
岑世英諗咗一陣,又講:「做得呢行,條路自己揀,所以仆街都唔可以喊。」
 
阿強眨眨眼,似明似唔明。
 
「嗚—」
 
岑世英部電話突然震起黎。
 
「屌,阿明條粉皮做咩?」岑世英一路講,一路接起電話。
 
岑世英講:「喂?做咩?」
 
但對面嘅唔係阿明。
 
而係一把令人毛骨悚然嘅沙啞聲音。
 
沙啞聲音乾笑住講:「哈哈哈,好對唔住。呀偵探先生,你同你條女嘅偵探遊戲,到此為止。」
 
岑世英皺眉,講:「你噏乜鳩呀?咩『我條女』?你打錯呀?」
 
「哦,乜唔係你條女咩?」沙啞嘅聲音有啲疑惑。「不過唔緊要,係唔係你條女,我諗你都會黎救佢架可?個有錢女關芷怡。」
 
岑世英反問:「你話捉撚咗佢就捉撚咗?我點解要信你?」
 
沙啞嘅聲音冷笑幾聲:「哈哈哈。想玩GPS追蹤陰我?你睇下關芷怡嘅GPS係咪喺個海度?」
 
聽到對方講到自己之前畀Veronica嘅GPS追蹤器,岑世英心頭猛震。佢開GPS追蹤界面睇,見到Veronica嘅座標果然喺維港度。
 
「你點知道GPS單野架?」岑世英勉力壓制自己嘅不安感。
 
「哈哈哈,我知好多野添。不過冇理由講曬畀你聽。」沙啞嘅聲音講。「而家你嘅偵探所嗰度,有條線索可以帶你黎我呢度。聽日天光之前搵到呢度嘅話,我就考慮下唔殺關芷怡。唔係嘅話,你都會收到佢,不過斬件上:頭、身、手、腳,哈哈哈哈哈!」
 
「喂!」岑世英拎住電話大叫。「喂!喂!」
 
「咚—」但對面已經收咗線。
 
「走!返偵探所!」岑世英即刻同阿強講。
 
佢地兩個即刻飛的返偵探所。