咁之後幾日都相安無事,我都要趕新年功課,一直閉關。 

七星果件事Uncle都無再提起,啊話時話我呢幾日都好似無見到Uncle喎。 

聽佢地講話咩最近公司有大project,所以好忙無時間返黎。 

不過奇怪既係,大家姐呢幾日一反常態,收起左平時既笑容,愁眉苦臉咁。 

你知啦,大家姐平時成個傻大姐咁,成日笑,好感染到身邊既人,令人開心。 



而家佢咁既樣,搞到我又開始亂諗野,諗到底係咪發生左D乜事。 

最後我都係壓制唔住好奇心,見大家姐一個人坐係梳化果陣去左搵佢。 

講開又講,大家姐而家呢個苦苦不樂既樣都幾正。 

我:「大家姐。」 

大家姐:「咦係阿明啊…今日大家姐我無心情玩大富翁啊,你地自己玩喇。」 



我:「唔係呀大家姐我唔係搵你玩架,係最近我好似見你好似唔開心咁,所以想黎睇下有無野幫到你。」 

大家姐並無即刻答我,而係摸住自己塊臉先,係度自言自語。 

大家姐:「乜我真係咩事情都擺哂上去塊臉度咩…」 

「阿明,我就只係話你知,你唔可以話俾Sarah佢地知,得唔得?」 

講到咁嚴重,我忍唔住吞啖口水定下驚,準備迎接接下來黎既衝擊。




我:「我明白喇,我可以向你保證,我唔會同Sarah佢地講,甚至連二家姐我都唔會講。」 

大家姐:「咁又唔洗…阿May佢都知既…」 

二家姐都知?咁會係咩事? 

大家姐:「其實呢..Daddy佢公司出左D事,而家可能會差人錢..」 

我:「點解會咁既?投資失利?」 

大家姐:「詳情Daddy都無講比我地知..只係話有個計劃既拍檔既公司突然破左產,被迫退出計劃。」 

「咁變相個計劃要由我地公司獨自承擔,但資金唔夠..就算一口氣將公司可以用既流動資金,都係差二千萬..」 



「如果完成唔到呢個計劃,我地會被人告毀約...要賠成億。」 

「所以呢幾日我地就係度傾緊,洗唔洗按左呢間屋佢..」 

嘩,二千萬..咁可以買幾多杯新地? 

我:「咁…」 

大家姐:「咁你又唔洗咁擔心既,呢D事我地呢D大人會諗辦法解決架啦,只係暫時未諗到啫。」 

「啊~講完成個人舒服哂!多謝你啊阿明,不過你記住唔好同Sarah佢地講呀!」 

大家姐講完就重拾笑容,相反我聽完就一臉沉重。 

好似好大件事咁喎真係..係咪真係有辦法架..二千萬喎講緊.. 



蘭姨:「大小姐,有客人。」 

大家姐:「客人?邊個黎左?」 

「我地好耐無見喇,家晨仲有阿明。」 

呢把聲係!? 

我聽到之後九秒九望過去大門口,果然係佢。 

李氏主席,仲有佢兩個保鏢。


大家姐:「eh…呢層我都唔係好清楚,但Daddy佢唔係屋企,我而家就去打個電話比佢,請你等一陣。」 



李生:「好,咁就麻煩你啦家晨。」 

聽完李生咁講之後大家姐就行埋一邊,留低我同蘭姨去應付。 

蘭姨好快就用去沖茶做藉口脫離戰線,要我一個孤軍作戰,不過我又無得走,唯有面對。 

李生一直望住我,笑淫淫咁,完全唔知佢心入面諗緊乜。 

總言至之,都係請佢坐低先啦,話哂過門都係客,呢D基本禮貌點都要有既。 

我:「請坐呀,茶好快就會送到。」 

李生:「噢,好呀唔該你。」 



之後佢就坐低左係梳化,蘭姨亦九秒九咁遞上荼,之後就又走開。 

李生佢無講乜野,而係好專心咁飲茶。 

一杯紅茶可以飲幾耐吖,佢好快就放低番個杯,繼續望住我,搞到我好尷尬,好想走。 

點解大家姐咁耐都未打完電話返黎架… 

咪啦,就用呢樣野黎甩身啦。 

正當我想開聲果陣,李生居然搶先我一步講野。 

李生:「阿曹應該係之前已經同你講左架喇,七星既事你考慮成點?」 

七星?係喎!!! 

或者我可以用呢樣野去幫屋企今次個危機!!! 

雖然咁係代表住我可能又要去置身於權力遊戲,但係可以幫到大家姐佢地手的話,無所謂啦.. 

而且或者呢個都係我既宿命,注定要玩呢個遊戲.. 

不過點都好,而家最重要係要將呢個「七星」賣個好價錢...即係話我要同全香港最有錢既人講數...