【第五章 混戰前夕】
 
「馬…馬泰!」
 
我憑直覺衝咗出馬路,想睇下馬泰有冇事。而撞到佢嘅司機都落咗車睇情況。
 
之不過…馬泰消失咗。
 
「唔見咗?返咗去未來?」
 




呢個係我第一個想法,亦都係唯一合理嘅解釋。
 
「阿澤!佢點呀?」
 
我嚇到坐低咗喺地下。唔知點解,呢個時候我孭住嘅書包份外沈重。
 
「佢…返咗去未來喇。」
 
我喺受驚狀態下,勉強講得出嘅得呢幾隻字。
 




我呆咗幾分鐘,個司機都喺隔離手足無措咗幾分鐘。到我發完呆嘅時候,警察已經到咗。
 
老實講,警察都做唔到啲咩,車頭凹咗,但係唔見傷者,完全冇證據,唯有將呢件事當做超自然現象處理。
 
警察走咗之後,人群都散去,阿莫都叫我返去休息下先。
 
我咁大個人先第一次親眼見到車禍,就梗係會嚇一嚇,但係當我可以靜靜哋坐低嗰陣,我就開始喺度諗…
 
「馬泰去咗邊?」
 




「佢有冇事?」
 
「咁之後又會發生啲咩事?」
 
一大堆疑問喺我個腦度轉嚟轉去。我越諗越攰,就唯有好好瞓一覺,遲啲再諗。
 
2056年9月1日
 
「馬泰嗰個白痴,咁都俾車撞到…好彩個傳送器有緊急遣返,可以即刻送你返嚟。如果你喺2016年死咗嘅話,都唔知點算。」
 
F喺馬泰嘅時空傳送器度裝咗自動緊急遣返,如果偵測到有特別情況,會即刻將馬泰傳送返2056年。
 
啱啱就係因為偵測到猛烈撞撃,所以送咗馬泰返2056年。
 
F雙手帶上白色皮手套,再攞起身旁嘅面具,將面具帶上。




 
「而家…我唯有親自出馬…我要令林天澤不復存在!」
 
另一邊廂。
 
「林博士!」
 
Angela衝咗入林天澤間房。
 
「做咩好似咁心急咁?係咪發生咗咩事?」
 
「F…F佢…」
 
「你唞返順條氣先啦。」
 




「好…好急架…F佢…打算去2016年呀!」
 
「范子軒佢…諗住去2016年?」
 
「係呀,我阿哥…吖唔係,F派嘅特務喺2016年撞咗車,做唔到改變歷史嘅任務,所以F佢要親自去2016年呀!」
 
「唔怪之得…原來你阿哥係F手下嘅特務…我都懷疑緊你架喇…點會知道咁多消息…不過我信你,你肯跑幾層樓梯上嚟同我講呢件事。」
 
「但係…林博士,你唔擔心自己咩?」
 
「雖然佢咁樣做都唔會影響到呢個世界,但係起碼都係以前嘅自己。唔通…我要破戒?」
 
「林博士…」
 
「知唔知F幾時會出發?」




 
「據我所知,F手頭上都有好多嘢未搞掂。我諗…要到10月佢先出到發。」
 
「咁我做埋啲調整就出發啦。Angela,我信得過你,你記住幫我睇住呢度。」
 
「知道。」
 
「因為…我可能會返唔到嚟。」
 
待續…