【第七章 F之自白(二)】
 
訓練特務,初初係想搵人暗殺林天澤。但係次次都失敗。於是,我開始向另一個方向諗...
 
改變歷史。
 
冇錯,既然佢發明得時光機,我點解唔可以以其人之道還治其人之身?
 
只要令佢細個嗰陣冇咁聰明,佢就唔會發明到時光機,咁而家嘅佢,甚至連大學教授都做唔到!
 


所以,我開始派人幫我將時光機嘅技術搵返嚟。
 
但係,我發現,原來技術已經俾政府保咗密,仲要係林天澤佢自己要求嘅。目的係為咗唔俾技術落入不法之徒嘅手中。
 
於是,我透過賄賂中國中央情報局,成功獲得技術藍圖。之後我將藍圖交俾我手下嘅科學家團隊研究。
 
到咗2056年,我哋完全掌握技術,仲製造出傳送器。
 
我當然急不及待,立即就派咗S級特務馬泰前往2016年。
 


點解係2016年?因為...所有嘢,都係喺2016年開始。
 
2016年9月28日
 
小息前五分鐘,坐喺課室等落小息嘅我,腦入面都冇位擺老師講嘅嘢。因為,我根本冇興趣上歷史堂。
 
落咗堂,我走咗去隔離C班課室搵林天澤。
 
「林天澤!」
 


「范子軒…?」
 
「我想同你傾下。」
 
「好。」
 
之後,我同林天澤兩個,一人一罐可樂,坐喺籃球場隔離嘅長櫈度。
 
林天潭首先開口。
 
「搵我…做咩?」
 
「我諗…揀咗文科,係我有生以嚟做得最差嘅決定。」
 
「你唔係話,你阿媽叫你揀文科咩?」


 
「係就係,不過我揀完文科之後,都覺得好後悔,開咗學之後,我甚至對啲課堂冇興趣。」
 
「咁你想點?」
 
「我唔知點同阿媽講…」
 
「唉,咪又係怪獸家長。」
 
「你話我阿媽係怪獸家長?」
 
我當時激動到扯住林天澤件衫。因為我估唔到…佢將我最唔想承認嘅事實講咗出嚟。
 
然而佢俾我嘅回覆,又係嗰個漠不關心嘅表情,同埋一句令我喊出嚟嘅說話。
 


「乜唔係咩?我講事實咋!你都已經高中架喇,十幾歲人,好心你就去諗下自己嘅人生應該係點。係自己選擇,定係俾你阿媽控制。」
 
老實講,我到咗大學,讀法律,都係阿媽嘅決定。直至我建黨,開始從政,先係第一個完全自己做嘅決定。
 
就係林天澤佢呢一句,令我十分憎佢。於是我就要解決佢。
 
可能你會想知,點解我咁信馬泰呢個人?因為佢做過嘅任務,冇一次係失敗,佢又好打得,所以就送佢去。
 
估唔到...佢竟然只係四肢發達,頭腦簡單。喺2016年俾林天澤講咗幾句,就投哂降,返咗嚟。
 
我當然唔會就咁放棄,於是我叫咗佢返去2016年。
 
可惜...兩個月後佢俾車撞到,要留喺醫院養病。
 
好彩我仲有秘密武器。邱一晉。


 
佢係僅次於馬泰嘅S級特務,佢除咗打得,行事仲謹慎小心,而且又對我忠心,可以話係勁過馬泰。
 
不過佢暗殺林天澤失敗過,我先唔再用佢。而家係重用佢嘅好時機。
 
林天澤…放長雙眼睇啦!我一定會令你生不如死!
 
待續…