[港版無限流][長篇] 恐怖輪迴: 東土殺戳～駕崩

在後山山洞內。

「班友攪咩？去咁鬼耐。」秦檜皺著眉頭地說著。

「妖魔！你一定會落地獄㗎！」秦檜身旁一個囚牢中其中一名少女向其罵著。

「呵呵，公主，冥界咪係你哋口中㗎地獄囉，我由嗰邊嚟㗎嘛。」秦檜笑著道「況且你父皇個靈魂都已經落咗去冥界，妳好快都陪佢啦。」

「你亂講！我父皇貴為九五之尊，褔與天齊，邊會落地獄。」那公主繼續怒罵著。





「哈哈，佢係唔係福與天齊，我睇唔出，但我睇得出妳宜家自身難保。」秦檜淫笑道「試諗吓，堂堂大宋公主，竟然俾當朝相國污辱，傳咗出去，你估天下人會點諗？」

「你卑鄙！」公主紅著臉罵道。

「唔只咁，如果俾天下人知道公主唔只同相國有染，仲同父皇通姦亂倫，咁又會點？」趙構突然出現在秦檜背後，奸笑著說。

「你唔係父皇，你個妖魔快啲還返父皇俾我。」公主指著血紅色眼睛的趙構哭罵著。

「我當然唔係，但我用緊嘅身體係，到時懷咗妳老豆嘅骨肉，睇吓後世嘅史書會點寫？」趙構大笑說道。





「你哋兩個無恥。」說罷，公主氣得吐血。古代女子特別重視貞潔，即使被人侵犯，也會憤慨自殺，更何況通姦亂倫，而她更是堂堂一國千金。

「大祭司，殿下，宜家仲未揾夠10萬童男童女，暫時唔好破佢身住。」李公公在趙構身後低聲道。

「哼，嗰班廢物到依家都未返，如果冇收穫，煉獄大牢等緊佢哋。」秦檜一臉不滿地說著。

「殿下……」其中一名護衛從山洞外跌跌撞撞地跑進來。

「發生咩事？」趙構皺著眉頭問道。





「有人想攻入山洞，出面啲守衛宜家傷亡慘重呀。」那名護衛急忙地說。

「咩人想攻入嚟？金兵？」趙構繼續問道。

「唔係金兵，係……」那名護衛喘著氣説。

「我唔係喪屍……我唔係怪物……我唔係喪屍……我唔係怪物……」突然有一道女聲從山洞外傳出。

趙構等人抬頭看向山洞洞口方向，只見7道人影正在那裡站著。

*******

在一個馬車中。

「我總覺得林軒有嘢瞞住我哋。」喬欣平淡地說。





「好明顯啦，但我諗極都唔明，佢點樣估到我可以造陰兵？」李文摸著下巴説道。

「佢個腦唔係常人結構，所以我先願意聽佢計劃行事。」凌天搖了搖頭，閉著眼說道。

「但就算係咁都無理由可以估到呢個地步掛，如果唔係我有支雜牌軍頂住，唔好話靜江府，我哋連秦明縣都未必守得住呀。」李文凝重地說著，他同樣不喜歡被算計。

「信我，佢做得到。總之佢嘅計劃我哋照做，但同時要保障返自己。」凌天苦笑地説著，心道「如果林軒真係估到李文可以造陰兵，咁好可能真係佢策劃將李文啲陰兵打死曬佢，從而唔俾李文提升得過快。」

「我就唔信佢咁犀利，任務時間就到喇，但唔好話主線任務，連支線任務都未完成到呀。」喬欣不滿地說著。

「12號隊隊員孫恩死亡。」

「12號隊成功擊殺秦檜，接受支線任務者獎勵10000冥幣。」





「12號隊隊員黃雲死亡。」

「12號隊隊員葉辰死亡。」

「12號隊隊員蕭莜死亡。」

「12號隊成功擊殺大宋皇帝趙構，接受支線任務者獎勵20000冥幣。」

「12號隊隊員楚宜死亡。」

「12號隊隊員陳琳死亡。」

冥主的提示音突然響起，但其內容更令3人感到震驚。

支線任務的突然完成及眾多隊員同時間死亡，其信息量之大，令3人全都同時露出錯愕的神色。





半响，喬欣率先反應過來，下了馬車，大叫道「林軒你個仆街！快啲同老娘出嚟解釋發生咩事。」