連接升降機的殺戮: 第二十三章

（２３）




day  4  time left: 06:44:26








「阿琛……阿琛！」




小殺輕輕喚著正呼呼大睡的何夕琛。何夕琛正睡得迷糊，突然被人吵醒，難免有點不滿，於是有點晦氣地說：「咩呀。」








「已經夠一個鐘啦，我地係時候返去。要訓，返上屋企先訓啦。」




小殺的話把何夕琛帶回現實中。他猛然記起他們在不久之前才和眼罩女生死相搏，接著，為了逃過即死的厄運，小殺建議先在Ｋ樓隱藏身影約一個小時後才離開，就在小殺把風之時，他卻不爭氣地睡著了。








「……嗯。」




小殺扶起了何夕琛，並肩走到升降機前。回到小殺的家後，何夕琛急不及待地把令他滿頭大汗的頭盔除下，然而，他渾然不知其外殼的反光曾經救過他一命。




就在這個時候，小殺突然興奮地大叫：「太好啦！有人死左！我地安全啦！」








小殺第一時間查看電視便獲得了這個情報。




「阿琛。你早Ｄ休息啦。岩岩嘈醒左你，你應該仲好想繼續訓先係。」小殺說著的同時穿上鞋子，準備再次出門。




「妳又想去邊呀？」








「我要去ＧＹＭ佬屋企睇下『死亡報告』。等我，好快返。」




雖然如今已經安全，但為了未雨綢繆，確認一下死者總會帶來保障。到達ＧＹＭ佬的家後，小殺馬上開啟電視使用技能，發現死者只有一位：




 

ＯＬ

死亡時間：day 407:40:15





被師奶以菜刀貫穿心肺氣絕身亡。死亡場地為雞蟲的家。




 

看到了這樣的情報，小殺感到頗為訝異。




第一，是她小看了師奶，沒有想過她會有能耐殺人。








第二，就是她不明白為什麼ＯＬ會死在師奶手上，死亡地點卻是雞蟲的家。小殺馬上聯想到的是師奶和雞蟲組成了共同戰線，然而她卻認為二人的關係並不單純。始終在之前Ｇ樓時，任誰也看得出師奶和雞蟲並不咬弦，到底是什麼原因令他們走在一起呢。而且，若果他們合作起來的話，為什麼只有雞蟲的分數暴增，師奶的分數卻沒有太大變動呢。




小殺對於二人關係饒有意味。儘管情報充滿謎團，但唯一可以確定的，是雞蟲和師奶確實有著合作的跡象。




得出了這個結論後，小殺便回到家中。當她踏進門口時，卻發現何夕琛仍沒入睡，只是靜坐在客廳之中。




「嗯？阿琛？仲未休息？」




何夕琛的確很累，可是相比起休息，他認為有確重要的事要做。




「妳都應該係時候將所有既事話畀我聽啦。」




他要知道所有的事。他不想再不明不白地遊走在生與死之間。




被捲入遊戲的原因。背後的黑幕。眼罩女的事。逃出的方法。最後，還有小殺的身世。




「阿琛。」小殺之前的哀傷表情再次湧現，眼眶隱約蘊含淚水。少女，盡可能控制自己，以平靜的語調說：「我可以同你講。但係條件係……你一定要靠自己，記返起我既野。」




「吓？妳都痴線既！我之前真係冇見過妳喎。」




小殺苦笑，他的反應在意料之中。




可是，她卻仍要堅持。她為了他做了這樣多，這樣的任性應該可以接受吧，再者，作為被遺忘的存在，要由她親口把真相告知，未免太過可悲。




她只能輕泯嘴唇，低聲，但卻堅定地重申：「呢個係我既條件。」




看到小殺如此強硬，何夕琛知道她是不可能透露口風了。於是只能有點不滿地坐在一邊，背對著她鬧彆扭。




「阿琛……唔好嬲。」小殺走近，溫柔地拍著他的背說。




「……口口聲聲話同我組隊，但又咩都唔講。」




小殺嘆了一口氣。為了安撫何夕琛，決定折衷告知他另一樣的情報。




「對唔住，我唔可以講。但係，我可以話畀你知，呢個遊戲最後既隱藏規則……即係，呢個遊戲既真正玩法。」




聽到了小殺這番話後，何夕琛覺得難以置信。




「吓？呢個咪殺人遊戲囉！仲可以有咩真正玩法呀！」




「呢個遊戲並唔係只係打打殺殺咁簡單。唔同既人，會對呢個遊戲本質有唔同既解讀方式，從而有唔同既作戰策略。」




何夕琛一時間無法消化，只是木然地說：「我唔係好明妳講咩。」




「對於我黎講，呢個遊戲係情報戰。一直以黎，我行動之前都會從亡者報告、分數流動、紀錄映像呢三個能力所得黎既情報分析局勢，有左一手準備既我殺人起黎，自然佔有先機。」




是的。這是小殺的風格。雖然小殺的作戰能力很高，但真正讓她度過一重重難關的，是她精密的頭腦。




然而，就在發現後樓梯的秘密後，小殺有所動搖了。她意識到自己的策略並非最佳的作戰方式。




亦因為這個原因，小殺之前才會被焦慮所影響。




「我之前都講過，呢個遊戲單以武鬥係冇可能活到最後，因為智鬥上佔有更大比重。與其話呢個係大逃殺式既殺戮遊戲，倒不如話，呢個係殺人版既欺詐遊戲。」




小殺清徹的雙眸看著何夕琛。




「阿琛，我跟住落黎要解釋既野可能會好長……你……想唔想知？」




「想。」




小殺點了點頭。如今的小殺決定面對不利的事實，把真相告知何夕琛。




「開始之前，我又要問你一樣野。你有冇發現呢棟大廈同你原本住既有好大既差別？特別係升降機方面。」




小殺劈頭就問了這樣的問題，讓何夕琛不知如何回應。他只能喃喃說：「緊係大差別啦。我地以前都冇咩Ｋ樓……」




「我係指構造。其實我地今次遊戲裡面搭開既電梯，同一般住宅用電梯好唔同，絕對有經過調整－－第一點，就係我地每一部LIFT分別都有一個專屬既按鈕。阿琛，你記唔記得你平時準備出街果陣，你係會撳邊個掣？」




「吓？得一個之嘛……喔……」何夕琛發現了不妥的他方。




「冇錯，得一個。一般黎講，一個住客根本唔會要求去揀坐邊部LIFT。所以，只要撳左果個掣，四部LIFT入面最近果部就會去到佢既樓層，咁樣先有效率。但係，今次既殺人遊戲絕對唔同－－揀中適合既LIFT入Ｋ樓絕對係遊戲關鍵，所以個遊戲先會作出咁樣既設定。」




小殺又說：「第二點，就係升降機門外冇顯示到樓層，唯一到達樓層既提示，就係間lift外面既燈。」




一言驚醒夢中人。何夕琛馬上「哦！」的一聲叫了出來。




明明是這麼顯而易見的違和，可是他為什麼沒有發現呢。




「世界上大部份既升降機都會顯示出目前所在既樓層，呢個已經係約定俗成既設計。但係，我地依家搭緊既lift就缺少呢項情報，我認為，咁樣既設定係為左隱藏玩家所在既樓層，同埋Ｋ樓既真正位置。」




假設你要跟蹤一個人回家，卻不巧地未能跟隨對象進入升降機之中，只要一直盯著升降機上的指示器，在其靜止時，就可以推測出那個人所住的樓層。可是，這樣的技倆卻不可能派上用場。




聽到了這番話的何夕琛不禁抹了一額汗。他回想起一開始時被律師強迫到Ｋ樓探索，若果不是有這樣的設定，他家的位置早就曝光了。




「不過，點解要隱藏樓層？點解……」




小殺，嘴邊突然輕泯嘴唇，露出一道微笑。




「阿琛。你唔記得左後樓梯呢一樣野？除左坐LIFT之外，要去人地屋企偷襲人……後樓梯唔係一個好好既途徑咩。」




「吓……咁樣既話，我地咪好危險？」何夕琛驚慌失措。




小殺所說的何夕琛根本沒有想過，但他卻不得不在意。如果他們在睡夢中被入侵者攻擊，不就只有死路一條嗎。




小殺，卻沒有太過在意。




「放心啦，阿琛。只要你冇洩漏到某個秘密，基本上係冇人可以入侵你既樓層既，引申黎講，除左Ｇ樓之外，自己屋企算係第二安全既地方。阿琛……呢個算係同一般生存遊戲最大既分別，就係，我地有屬於自己既休息空間。」




在殺人遊戲中有一個絕對安全的棲身之處，簡直可以用奢侈來形容。更重要的是，那個地方是自己最熟悉的家。




「咁……到底係咩秘密呀？」




「阿琛。我入正題之前，你一定要明白呢棟大廈既構造先。第一，ＸＸ花園Ｈ座，總共有幾多層？」




小殺不知從何時拿出紙和筆，然後趴在地上開始繪畫圖表，方便解說。




「咪二十五層囉。」何夕琛不假思索地回答。




香港地少人多，一般中上級住宅大廈都會向高空發展，有二十多層絕不稀奇，而何夕琛他們身處的大廈，則共有二十五層。




「冇錯，二十五。我地今次遊戲既參加者，總共有幾多人？」




「十三。」




「好。呢個遊戲既規定，每一日一定要最少有一個人死。如果要進展到最後，咁遊戲最長既時間會係幾多日？」




何夕琛好像察覺到什麼，說出「十二」這個數字時，他的神情變得有點恍惚。




「十三加十二等如二十五。我地十三個人，每人各佔一個樓層。咁剩返既十二層呢？係咩呀？阿琛？」




小殺不再說話。看樣子，她在等待何夕琛回應。




「係……Ｋ樓？」




是的。假設殺人遊戲進展緩慢，每天只有一人死去，要死剩一人，自然需要十二天的時間。




若果遊戲要進行十二天，那就需要十二個場地。




十二層Ｋ樓。




「冇錯。全大廈每一層樓都有佢既存在價值。一係就係Ｋ樓，一係就係某住客既巢穴。」




小殺清了清喉嚨，然後在紙上畫出大廈的皺型。何夕琛低頭一看，發現小殺的畫功看起來非常孩子氣，而且，她還莫名其妙地畫了幾個紫色西瓜波，看在眼裡的何夕琛不禁啞然失笑。




「我之前都提過，呢棟大廈既LIFT隱藏左樓層既訊息，即係話你唔可以透過架LIFT黎得知Ｋ樓、同埋其他住客既位置。但係，後樓梯當然唔在此限啦。」




「係喎！咁即係話，只要我地一路行後樓梯，逐層逐層咁行，咁我地咪屈哂機？」何夕琛看來非常雀躍，因為他以為自己所說的絕對是遊戲的必勝法。然而，小殺卻沒有被他的興奮感染。




「阿琛。後樓梯既設定唔係想像中咁簡單。我頭先都話左，只要你既秘密冇洩漏出去，就算行後樓梯都冇可能去到你屋企。」




「果個秘密係咩？」何夕琛再一次問這個問題。




「秘密就係，你張卡後面果一堆數字。」




何夕琛猛地一驚，他差點忘記了卡片背後的確隱藏著一堆數字。他記得在遊戲剛開始時，紫色西瓜波曾經再三叮囑不要把那個像密碼般的數字告知別人，這點，不是跟小殺剛才所說的不謀而合嗎。




小殺一直保管著何夕琛的卡片。為了更進一步解釋，她把何夕琛的卡片交還給他，物歸原主的何夕琛馬上察看數字的端倪。




卡片的外觀看來跟信用卡沒有什麼分別，刻有十二個突起的銀色數字，而這十二個數字前，有一個小小的英文字母： Ｆ。




「Ｆ００１７３４２３２３９９？」何夕琛如此念著。「呢堆數字到底有咩含意呀？」




「Ｆ係ＦＬＯＯＲ既意思。００１７，即係話你住係１７樓。跟住果堆數字，係後樓梯既密碼。」




小殺這樣說著，順道把自己和ＧＹＭ的卡片拿出。ＧＹＭ佬住在１３樓，所以頭四個字是Ｆ００１３；而小殺住在３樓，卡片密碼開頭是Ｆ０００３。




何夕琛說不出話來。原來卡片所透露訊息是這樣的顯而易見，可是，他卻沒有好好留意。默然半晌後，他才怔怔地說：「咁之後果堆數字又係咩黎？」




「果堆數字，係後樓梯既密碼鎖所需要用到既密碼。每一個樓層既後樓梯入面，其實有一把密碼鎖，如果要由入面打開度門，就必與係個鎖度輸入張卡最後面果八個數字。」




既然升降機的設定有經過調整，那麼後樓梯有安裝密碼鎖，也絕不稀奇吧。




小殺的神情，看來有點怨懟。




「所以，我先至話呢個係欺詐遊戲黎。只要呃左人地個密碼……咁樣就算唔駛張卡，都可以入侵人地既樓層。與此同時，可以自出自入人地屋企，亦都可以視為一種無形威脅，咁樣支配起自己既成員就更加得心應手……」




小殺知道這裡的住客中，有一個人一直幹著這種欺騙的勾當。




何夕琛，突然在這個時候靈機一閃：「咦！如果你咁講既話，咁小毒撚……」




「冇錯。我果時太大意，以為整爛著張卡就可以廢左佢個技能，但係……某一個人發現在後用左呢種手法，張佢既能力據為己有。」




小殺之前變得如此焦慮，主要是因為她所擔心的已經實現。律師，早已先一步把毀掉的卡片回收，並得到了絕對的優勢。




她有點自責。




何夕琛看到小殺如此不高興，於是便安慰她：「……算啦。佢咪又係多一個技能咁大把！唔好唔記得我地都唔輸蝕，有三個技能呀！」




「……咁又係。」小殺苦笑。




他們只有這樣想了。然而，小毒撚的技能比他們想像中實用，律師能夠如此順利跟其他人交涉，它的功能可謂功不可沒。




「總括黎講，用後樓梯呢個途徑入侵人地屋企，就一定要知道人地屋企既樓層，同埋佢張卡既號碼。所以，我先至話呢個遊戲對某Ｄ人黎講，係欺詐遊戲黎。」




某人看準了人內心的恐懼而成為別人的寄托，再進一步讓對方把密碼和盤托出。這種乘虛而入的行為，說穿了就是欺詐。




「我地已經有卡，所以呢點對我對黎講唔受用，不過知道左呢點之後，我地起碼可以好好提防。講完住客既樓層之後，我要講既係後樓梯入面Ｋ樓既事。」




何夕琛有了一點眉目，神情不像之前迷惘，緩緩地點點頭。




「就結論黎講先。理論上，我地係可以行後樓梯直接進入Ｋ樓，以避過閉路電視既監測。」




「吓？」何夕琛一驚，接著，便有點激動地追問：「點解妳唔早Ｄ講？如果係咁既話，我地唔係應該一早就咁做咩？」




「冷靜Ｄ呀。阿琛。後樓梯唔係你想像中咁簡單。畀我講埋佢先。」




「哦。」




「首先我地重溫一下Ｋ樓既特性。每一層Ｋ樓只會開放一日，當一日終結迎來，果層Ｋ樓就會永久封閉，與此同時另一層Ｋ樓會開放。呢點你都知架啦？」




Ｋ樓每過一天都會變異，何夕琛早已有一番體會。他也知道，遊戲中「任何玩家如果在同一天內沒有脫離Ｋ樓就會受到處分」這個設定，最主要是為了限制所有玩家只能在同一層Ｋ樓中交戰。




就在這個時候，何夕琛好像想起了什麼。




「咪住先！小殺。你頭先話過，住戶度門後有密碼鎖，咁Ｋ樓呢？」




「外觀上，後樓梯入面每一度門都係一樣。」




「但係，Ｋ樓有咩密碼呀？我地唔住密碼，咁樣又點入去？」




「唔駛，Ｋ樓冇密碼。只要用力拉開度門，佢就會打開啦。」




「咦？咁樣既話，我地只要逐層逐層咁試咪得囉！如果開唔到門，我地就可能推論出果層係其他人屋企、未開放，或已經封閉既Ｋ樓三者其中之一……」何夕琛有點興奮地說。




「係呀。真正既難關，就係要係２５層入面搵出真正既Ｋ樓。阿琛，你覺得你自己會唔會夠體力行哂咁多層呀？而且，唔好唔記得Ｋ樓日日都會變，就算今日搵到Ｋ樓，聽日都要由頭再搵過。」




何夕琛為之語窒。他最討厭體力勞動了，要他每天也爬２５層樓，倒不如叫他去死。




「再者，就算你真係鍥而不捨咁樣行樓梯，到最後搵到Ｋ樓，你既體力肯定都會大打折扣啦，係咪？唔好忘記，去到Ｋ樓，就代表你已經踏入戰場，搞成咁，遇到其他人果時只會得不償失。」




何夕琛吞了一口口水，腦袋突然浮現自己在跑完樓梯後，被眼罩女碰過正著時的幻想。




這樣不是只有絕望嗎。




「不過，呢個都唔係最關鍵。跟住落黎我要講後樓梯要遵守既規則－－規則只有兩條，但佢地既存在令到我地唔可以濫用後樓梯既設定。始終，升降機先係最主要既進場交通工具呀。」語畢，小殺臉上帶有苦澀的笑容。




「講啦。小殺。」




「第一條，就係我地唔可以破壞門鎖，否則視作犯規。」




「……嗯，合理既。」




這點保障了住宅的安全，也就是說，只要沒有洩露密碼，自己的據點還是絕對安全的。




「第二點，就係我地唔可以係後樓梯逗留超過十分鐘。違者，亦都視作犯規。咁即係話，如果係後樓梯搵出Ｋ樓，就一定要十分鐘內完成。」




「即係話，要十分鐘跑２５層樓？」




「最壞既情況，係。」




有了時間上的限制，搜尋Ｋ樓位置變得更加難以實行。但是，小殺卻一臉平淡地說道：「不過呢點，對於有多卡既人黎講，都唔算係咩太大既難題既……」




「又吊人癮。講啦！」




小殺經常在賣關子，何夕琛變得有點不客氣了。




「嗚。又串我……」小殺被何夕琛一罵，不由得扁了扁嘴。然後，她繼續說：「重點就係果十分鐘入面。只要係每十分鐘要離開後樓梯既範圍，然後重新入返去就得啦。」




「……我唔係好明妳既意思。」




「阿琛。當人有愈多卡，或者知道愈多卡片密碼，係唔係就代表知道愈多樓層既真身？咁樣，果Ｄ樓層就可以成為checkpoint啦。臨近十分鐘期限，探索者就可以去到checkpoint回一回氣，咁樣一步一步咁搵，就算係弱不禁風既律師都可以輕鬆咁掩入耳目進入Ｋ樓。」




小殺所說的是事實。如今的律師，有自己、小毒撚、ＯＬ、師奶、基友Ａ和基友Ｂ共六個checkpoint，要找出Ｋ樓可謂不費吹灰之力，而事實上，只有他才有在後樓梯游走的本錢。




「原來係咁。咦！小殺……妳有三張卡，咁都應該ＯＫ架。」




「阿琛！」不知為何，小殺突然生氣起來，叉著腰惡狠狠地看著他。




「……咩呀。」何夕琛有點被嚇倒，戰戰兢兢地回應。




「我話哂都係女仔黎架！得三個checkpoint就要我跑樓梯，會唔會太冒險？對我又會唔會太過份？」




是的。雖然小殺殺人手段無比兇殘，不過她是女性這點是無容置疑的。




「對唔住囉。」




「哼。」小殺別過頭，然後繼續自說自話：「我係就係有三張卡，不過我唔會跑後樓梯！」




何夕琛見到小殺氣在頭上，也識相地閉上嘴巴。




「首先得三張卡實在太勉強……記唔記得呀，阿琛！我住係３樓，你住係１７樓……雖然中間有ＧＹＭ佬既１３樓，但要跑上跑落都幾勉強架。而且，如果一個唔好彩係後樓梯仆親行唔郁，咁就只有等死啦。」




因為checkpoint不足而必須加快腳步，發生意外的可能性也不是沒有的。小殺連這點也有考慮到，足以證明她的才智非凡。




「再者，我唔係太鐘意行後樓梯。我鐘意正面交鋒多Ｄ。之後既行動，我都係會搭返LIFT。」




因為小殺的能耐，她才有這番自信說這樣的話。




「……小殺。」何夕琛突然開口呼喊少女。




「咩呀。」




看樣子小殺仍在生氣。




「小殺……ＢＢ。唔好嬲啦。」




「！！！」




小殺聽到了「ＢＢ」的稱呼，「砰」的一聲，臉部發熱，變得像蘋果般通紅。她對可愛的東西沒有抵抗力，突然被這樣叫，內心便融化了。




除了紫色西瓜波以外，何夕琛似乎發現了小殺另一個弱點。




「呀……點呀？阿琛？」




心花怒放的小殺燦笑轉過頭，怒意全消。何夕琛，看到如此大反差的小殺，一時說不出話來。




「冇……我只係比較好奇，點解妳會知道遊戲規則，知得咁清楚之嘛。」




「因為佢清楚寫明囉。」




「吓？邊度呀！」




「就係度門後面，密碼鎖上少少既位置。我頭先所講既佢全部都清楚列明。」




答案出乎意料之外的簡單。




遊戲最後的守則就大剌剌地貼在大門之後，所以，之前阿源看到眼罩女把武器收起時，才篤定她知道那個秘密。而沒有踏入後樓梯領域的人，則絕對不會知道。




「唔係呀嘛。後樓梯竟然會將規條講得咁清楚？好似有得唔合常理……」




「點會唔合理？某程度上黎講，後樓梯係一種使用工具黎。正如滅火器外面都有貼哂使用方法同注意事項咁，一樣道理。」




知道後樓梯存在的人等同佔有具大優勢，這點就算是何夕琛也很清楚。於是，他如此提問：「……但係，咁樣會唔會唔公平呀。」




「點會？大門後面全部規條只係同後樓梯有關，用唔著後樓梯既人有必要知道呢Ｄ條款咩？」




小殺的回應聽來十分無情，何夕琛縱然不能反駁，卻也無法接受。看到何夕琛苦惱的樣子，小殺語重心長地說：「阿琛。後樓梯既規條我諗你都大致明白啦。但係佢存在既背後意義你又明唔明呢。」




小殺剛才玩笑的語調蕩然無存，何夕琛，搖頭回應。




「其實你有冇諗過，點解設計遊戲既人，會加入後樓梯呢個設定？點解後樓梯既隱藏規則，要同遊戲既主規則分開？」




「唔知。」




「佢既存在，就係為左區分出值得生存既人、同埋失去生存資格既人。」




小殺淺笑著注視何夕琛，語調帶點冰冷。




「妳既意思係，冇發現後樓梯呢樣野既人係抵死既？」




「係。」




小殺不帶一絲憐憫地說出了殘酷的答案，沒有半點遲疑。




「……痴線。」




被何夕琛指責麻木不仁，小殺沒有感到不快。她冷不防地問：「阿琛，聽我講。作為一個遊戲參加者，後樓梯既設定你覺得難唔難發現？」




「呃。」




若非小殺告知，何夕琛根本沒有想過後樓梯的事，所以只能呆滯地張著嘴。看到如此的何夕琛，小殺便知道不可能寄望他會說出她想聽的，於是徐徐說道：「其實真係唔難。」




「點解呀？」




「一棟大廈，起碼有一條後樓梯作為走火通道，呢點絕對係常識黎。呢點你唔可以否認掛。」




「……係既。」




「只要稍為動動腦筋，就應該會串連埋遊戲樓層呢一點，從而懷疑後樓梯既存在會唔會對遊戲造成影響。係唔係？」




「……係。」




「如果有左咁既諗法，係唔係會去後樓梯一探究竟，從而發現後樓梯既種種設定？」




小殺慢慢抽絲剝繭，引導何夕琛進入正題。她把話說得理所當然，就好像在說只要有一點常識的人就一定會發現後樓梯的存在，讓何夕琛無地自容。




「但係，我覺得妳講得太過份啦。人地唔似妳咁聰明架！」




「阿琛。遊戲既規條一開始就已經講明左，玩家要自我發掘出遊戲既隱藏規條。連後樓梯可以使用既可能性都冇考慮過，咁樣既弱者，又算唔算係放棄左自己生存既機會呢？」




「所以，妳先話果Ｄ人唔配生存……」




小殺別過頭。




「強者，會不惜一切地求生；而弱者，只會坐以待斃。」




她所說的，就是她信奉的真理。




就像現今的社會。




某些人勞勞役役，卻沒法脫離自己身處的基層，是因為他們被惰性支配，只會跟從規則生活。他們嘴巴一直抱怨，但從來不會改變自身的固有思維，陷入迷失的他們，漸漸變得行屍走肉。




那些未發現後樓梯的人，就是這些已經放棄了思考，放棄了人生的人。




在小殺眼中他們只是失敗者。她絕對不會憐憫這些人。




在這場殺人遊戲之中，沒有覺悟去尋覓突破點的人，迎來的結局只有死亡。




何夕琛不發一語。他只是怔怔地看著小殺，想著：作為一個只是被告知後樓梯存在的人，又有沒有生存下去的資格呢。




「阿琛。就算你一開始冇諗過後樓梯既事都唔緊要。只要有我係度，我就一定唔會畀你死。」




小殺彷彿看穿了何夕琛的內心，堅定地說。




聽到小殺直接的表白，何夕琛覺得有點尷尬，於是搔著頭，有點生硬地想要改變話題：「既然我地知道左後樓梯既設定，我地跟住落黎應該點？」




「好似平時咁囉。如我頭先所講，我地都係唔會用後樓梯。」




「難得有優勢，唔用好似好唔抵喎……係啦！如果我地係其中一層埋伏果Ｄ巡邏後樓梯既人，會唔會有用呢？」




剛才，小殺諷刺不思考的人等同失去生存的資格，何夕琛自然不想成為其中之一，所以他盡可能思考，希望他的想法能派上用場。




「阿琛。咁樣只會得不償失。一黎你又唔知佢幾時巡樓，冇理由要２４小時咁等架。況且，係後樓梯咁狹窄既環境開戰太危險啦……真係搏唔過。信我啦。只要跟返原本計劃，勝利一定會係屬於我地。」




「……唉。」難得的提案不被採納，何夕琛有點意志消沉。不過，他又想出了一個新點子：「即係話，我地跟住淨係坐lift？」




「係呀。」




「其實……攝lift呢個方法可唔可行？」




「嗯？講黎聽下？」小殺揚眉。




「其實，遊戲不嬲咪有一個規則，話每日都要去Ｋ樓留足一個鐘既？如果我地先下手為強，叫哂ＤLIFT去我地既樓層，再霸住哂所有LIFT，咁佢地咪去唔到Ｋ樓，到最後咪只有慢慢等死？」




「嗯……呢個諗法同LIAR GAME入面既感染遊戲『霸房』既策略好似。靈感，應該係果度而黎啦？」




何夕琛尷尬地笑了笑，似乎是默認了。




「阿琛……你肯用腦去諗橋，我好開心！」小殺看來甚感欣慰。「不過，咁樣係唔可行架。」




「點解？」




「因為咁樣做等同自殺。」




「吓？唔係呀嘛！我唔明喎！佢地都入唔到Ｋ樓，咪只有乖乖等死？」




「阿琛。老實講句，雞蟲師奶之流可能未必諗到呢條橋，但係我相信阿源同律師呢兩個勁人一定有考慮過。遊戲進展到依家呢個地步，佢地都係冇咁做。知唔知點解？」




何夕琛迷惘地搖頭。




「因為後樓梯。有左後樓梯呢個入Ｋ樓既第五度門，你封哂ＤLIFT都冇用。」




「但係……你唔係話除非有過人既體力，如果唔係冇可能係十分鐘之內搵到Ｋ樓咩？」




「如果係一個人就係。當你咁做既時候，你就會成為首要既被圍剿對象，間接令其他人團結起黎。當人一多，佢地行後樓梯時就有更多既checkpoint，搵Ｋ樓亦都變得輕而易舉。」




小殺輕描淡寫，就把何夕琛絞盡腦汁的計劃推翻了。被潑了冷水的何夕琛，低著頭不發一言。




「就算霸哂ＤLIFT佢地都會入到Ｋ樓，所以咁做係冇意義既。更進一步講，你咁做只會激起公憤，之後既遊戲，你既一舉一動會被嚴密監察，要生存落去就更加舉步維艱。」




「……嗯。」




小殺又說：「除左呢點之外，咁樣做仲會引申出另一個大問題。升降機表面上係唯一進入Ｋ樓樓層既途徑，如果用攝LIFT既手段封鎖左佢，其他人就會不得不去搵辦法入返Ｋ樓，咁好自然就會發現後樓梯既秘密啦。後樓梯既優勢係只屬於強者既，如果個個都知既話，遊戲自然大亂，你話係咪？阿琛？」




何夕琛難為情得想找個洞鑽進去。他甚至有想推翻桌子，大喊一句「不要說了」的衝動。




「呵欠……」小殺突然伸了個懶腰。




自跟眼罩女激戰後，她便沒有好好休息過，再加上剛才費了幾番唇舌為何夕琛講解，睡意愈來愈濃。




「阿琛，你仲有冇問題？冇既話，我訓先啦。你都要早Ｄ休息呀。」說著，小殺抱起了她的玉桂狗娃娃進入睡房，準備入眠。




惱羞成怒的何夕琛，在遠處低聲說道：「訓啦柒頭。」




「阿琛？你同我講野？」




「冇……冇呀。叫你早Ｄ休息之嘛。」




「嗯，早抖！」小殺笑意盈盈地說。




二人當天的行動亦告結束。在他們入睡之時，ＤＡＹ５的死鬥已經悄悄地拉起幃幕。