《700萬種超能力》－在香港，人人皆有超能力: 第九章

「咩話？你有犯罪…………！」

阿熹粗暴地用手捂著我的嘴巴，不讓我說下去。「一陣俾你delete咗我嘅超能力點算？」

幸好在我一搞清楚自己超能力發動條件後，我就已經把所有資料都告訴阿熹，不然剛才我就衝口而出消除了他的能力，當了豬隊友了。

「堅唔堅呀？嗱嗱臨測試吓好喎！」我邊說邊拿出褲袋中的手機，解鎖，然後打字。

阿熹稍為冷靜下來，說道：「唔…你都講得啱！都係再測試吓好。……喂，你係咪聽緊㗎？仲掛住玩whatsapp……」





我打好了字，按下了發送，在我傳出訊息後一秒，阿熹的手機響起了提示音。

「阿熹有犯罪後匿埋就唔會犯法嘅超能力！你會唔會搵到方法測試？」－阿熹對著他的手機默唸了我剛剛發到群組的訊息，而群組中有我、阿熹，以及－阿Jill。他的臉色一沉，想要發作，卻礙於正身處人多的辦公室。他咬牙切齒地瞪著我說：「喂！你癲咗呀？做乜話俾果梳蕉聽？」

「咁我嘅能力都係佢諗計幫我測試出嚟，我諗住佢都可以幫你呀嘛！」
「你好信佢咩？佢係人係鬼，你都未知呀！」
「我咪講過囉，阿Jill佢已經知錯。」
「就係佢呀，幫果個施金蘭贏咗立法會個位返嚟㗎，佢出賣香港呀！」
「佢話佢係為咗屋企人先會幫新港聯手，佢係被迫㗎！」





阿熹突然停止跟我爭論，平靜地看著我，說：「阿雲，你變到好奇怪。點解佢講乜嘢，你都信到十足？唔通，你真係鐘意咗佢？」

我並不是「受到荷爾蒙欺騙」而對她投下相信一票。投下這信任一票，是憑我的直覺，我直覺她並不是壞人。不過，我承認，阿Jill還算是一個美少女。一雙大眼睛、柔順的長髮、白裡透紅的肌膚，要不是初次見面時發生了那種事，我對這個少女一定會產生好感。

阿熹見我久久沒有回答，便再三囑咐我說：「總之咪再同佢講咁多！測試呢件事，我自己會諗辦法，唔駛佢幫手！」

因為阿熹反對我再向阿Jill透露更多，我也不方便在群組中再跟她多說。無獨有偶，阿Jill也就只在群組回覆了一句話：

[下？即系點呀？吾系好明但系好似會好有用？]





然後，大概是見我們一直未有回覆吧，她也沒有再在群組中追問下去。

晚上，我在沒亮燈的睡房中拿著電話，反覆解鎖又反覆關上屏幕。最後，在10時13分，我終於下定了決心，撥了一通電話給阿Jill。

「喂，阿雲？」電話的另一端，傳來了阿Jill甜美的聲線。

「阻唔阻你呀？」

「我未瞓呀，你講吖！」

「冇，我想講返關於阿熹超能力嘅嘢俾你知。」說罷，我心頭湧現了對阿熹的歉意。

「好呀好呀！我都好想知道究竟佢嘅能力幫唔幫到我！」電話中傳來她充滿期待的聲線。

「等我諗吓由邊度開始講先。」我猶豫一會，深呼吸一下：「個故仔有啲長，唔好介意。」





接下來，我把我跟思詩之間的故事，關於我怎樣對她，關於她怎樣負我，重頭到尾說了出來。阿Jill一言不發，耐心地聽完我的故事。

把我的戀愛故事拿出來跟她分享，不是很正常的事嗎？阿熹是因為掌刮了思詩，才會發現自己的超能力；而要了解阿熹掌刮思詩的動機，就要先知道我跟思詩之間的故事。我這樣拼命地說服著自己，心裡卻暗自期待阿Jill會用她那甜美的聲線回應說：「你好慘啊」、「如果我係你女朋友我一定會好好珍惜你」之類的說話。

我料不到阿Jill說：「你好自私呀。」

「吓？」我對她的這個回應始料不及。

「你真係勁自私呀！你為果個女仔痛苦嘅時候，你身邊關心你嘅人其實一樣痛苦！」

我不知道該怎樣回答她，所以我選擇沉默，讓給她繼續說。

「雖然係因為想幫你，阿熹先會發現呢個超能力……但係如果佢冇呢個超能力呢？傷人可以坐監㗎！」





「喂，又唔係我叫佢郁手㗎喎！」我倒是能夠流利地自辯。

「阿熹係你最好嘅兄弟，佢睇見你一路俾人傷害，想幫你但又幫唔到，佢一定同你一樣痛苦！就係因為好想幫你，佢先至會一時衝動，刮咗果個女仔一巴！」

「我夠知佢係為咗我啦，但係……」

她打斷了我的話。「既然咁多人為你好，點解你仲要為果個女仔所做嘅嘢傷心呢？」

「咁我可以點先？人生入面總有啲嘢，唔係話放低就可以即刻放低！我知道我要放手，但我控制唔到自己個心！」

「你嘅世界，並唔係只有果個女仔！你仲有真心對你好嘅朋友同家人！仲有好多有意義嘅嘢等緊你做！」她繼續說：「雖然你個心會好痛，但身邊關心你嘅人都會支持你㗎，快啲企返起身啦！」

在漆黑的房間中，我瞄到掛在我床頭那幾幀跟思詩旅行時拍下的即影即有照片，然後，我的視線突然變得模糊。我該把思詩的一切都真正放下了，可是我不肯定自己能否做到。但是，我知道我的身邊會有人支持著我，有家人、有阿熹、還有……阿Jill。

第二日，我冒著會被阿熹臭罵一頓的危險，把昨晚阿Jill在電話中所說的都告訴阿熹，想讓他對阿Jill改觀。





阿熹板著臉聽完我的覆述後，我戰戰兢兢地問：「咁你要去測試你個超能力果陣，阿Jill可唔可以跟埋去呀？」



「……你鐘意啦。」