《700萬種超能力》－在香港，人人皆有超能力: 第十章

「你傻㗎？呢度有晒閉路電視㗎！」

「你估office入面冇裝CCTV咩？邊個返工蛇王，公司都知呀！」

「……你啱。」對於阿熹的回答，我無從反駁。

在陸氏地產集團大樓—即是我公司的停車場內，我、阿熹、以及阿Jill，正鬼鬼祟祟地躲在防煙門後面。在這個下班時間，一個中年男人正走近泊在停車場的一輛瑪莎拉蒂。

「果個咪係李永義？陸氏高層喎！」阿Jill認出了這個男人。





「係呀，呢條友自己揸瑪莎拉蒂返工㗎。」

「你打算向佢落手？想做啲乜？」其實我對於阿熹接下來要做的事非常不安。因為阿熹只有事前告訴我們的集合時間跟地點，計劃的詳情他卻故弄玄虛。

「睇住嚟啦，我一直都想試吓咁做。」

阿熹留下一個充滿自信的笑容，便推開防煙門，徑自走到剛剛坐上駕駛席的李永義身旁。接下來，阿熹竟然一手抓住李永義的衣領，強行把他拉下車！我已經被阿熹的舉動嚇到心臟也快跳出來了，這個時候阿熹駕車駛到防煙門前，示意我們上車。我把心一橫，便推開防煙門衝上去，阿Jill也緊隨其後。

這簡直是我人生中做過最荒唐的事。我的死黨阿熹，正在駕著從別人處搶來的瑪莎拉蒂，載著我跟一個認識了沒多久的少女阿Jill，從中環沿著干諾道中直駛往西面。





阿熹把車窗調較下來，享受駕著百萬座駕風馳電掣的快感。馳騁一會後，他以輕快的聲線說：「好！啲星星消失晒喇！」

聽到這句話後，我跟阿Jill便從壓力之中釋放出來，沉重地鬆了一口氣。

「原來你有車牌？」

「唔駛驚喎，死唔去嘅。」

「俾你嚇餐死！我頭先仲以為你要去殺李永義！」





「唔會啦！」阿熹把車窗關上，「其實我上次刮完思詩，我見到四粒星囉。」

「咁多？」我吃驚。

「吓？星星多同少有分別㗎？」不知GTA為何物的阿Jill一臉疑惑。

為免阿熹動怒，我搶著向阿Jill解釋：「即係呢，喺遊戲入面，視乎犯咗嘅罪行，愈嚴重就愈多星。愈多星星，被追捕嘅情況就愈嚴重……」

在阿Jill正在消化我的話之際，阿熹裝出猙獰的奸笑問阿Jill：「不過喺GTA嘅世界，殺人反而唔係最嚴重。係咪想我喺你身上試吓？」

在後座的阿Jill從倒後鏡中看到阿熹的狡猾眼神，驚慌得整個身體挨後，縮起肩膊。

「哈哈哈！講笑咋！雖然我唔打算殺人，但係我刮思詩都已經有四粒星，如果殺咗人，可能直接六星㖭呀。」

「六星會點㗎？」阿Jill雖然害怕，但還是禁不住好奇。





他指指車窗外的天空，說：「突然嚟架直升機射撚死我囉！到時我就唔係WASTED再喺醫院行返出嚟咁簡單喇。」

說到關乎人命的事，氣氛就變得嚴肅起來，車箱中又一片沉默。雖然，我心底裡正在慶幸阿熹不打算用這個能力殺人。

駕車離開天橋後，阿熹輕嘆一下，然後就說：「玩完，家吓兜返返公司，還返架車俾李永義。」

「吓？我以為你要將呢架嘢據為己有㖭。」我心裡抹一把冷汗。

「答返你頭先個問題啦。車牌我就考咗好耐喇，不過香港啲車位炒到貴過外國啲別墅呀，仲講養車？所以我咪一直冇機會揸囉！呢架嘢，我都係無福消受㗎喇。」

我稍為放心：「點知你想點啫，話晒呢架嘢都值成球呀嘛。」

「GTA入面最多都係偷車之嘛，賣失車套現嘅話會有咩嘢後果？冇人知道，我亦唔想冒險。」





阿熹把瑪莎拉蒂駛回公司停車場，離遠已經看見李永義仍然獨個站在他的車位上。駛到李永義跟前的這段路明明很短，我的心臟卻愈跳愈快，愈跳愈激烈。我緊握著雙拳四處張望，心裡總覺得停車場內四處都有伏兵，準備把我們這三個偷車賊一舉捉拿。

車停了，我們趕緊全部跳下車。李永義跟阿熹對望了一下，然後就像沒有發生過任何事一樣，駕著他的愛車絕塵而去。待瑪莎拉蒂在我們的視線範圍內完全消失後，我們三人幾乎同時重重地「啊—」的舒出一口氣。

「好喇，呢個測試，係成功嘅！」阿熹舉高雙臂伸了個懶腰，狀甚輕鬆。

「你個超能力，實在太神奇喇！」阿Jill以她的一雙明眸敬佩地凝視著阿熹，令我看得有點不是味兒。

阿熹瞧了阿Jill一眼，沒有向她作出任何回應，便轉而對著我說：「阿雲，去食飯喇，我請！」

「咁阿Jill……」

「唔、唔緊要啦，我自己走得㗎喇，今日多謝你哋叫埋我嚟呀。」她的表情略顯尷尬。

趁著阿熹轉身往出口的方向走，阿Jill悄悄拉著我的衫角，誠惶誠恐地細聲詢問：「如果…我叫阿熹用佢嘅超能力幫手，你估佢會唔會幫我？」





「我估佢會同我一樣，睇吓件事值唔值得幫先囉。話時話，你成日話要幫手，究竟係咩嘢事啫？」

她看著我，欲言又止。

「阿雲！仲唔行？」遠處的阿熹催促著我，我拋下了阿Jill，頭也不回地離開了停車場。