《700萬種超能力》－在香港，人人皆有超能力: 第十七章

施金蘭有個獨生子，名叫陳天倫，是應屆大學畢業生。為了跟他接觸，我們來到了他的新寓所樓下。我們故意挑個比較晚的時間來，確保他已經回家。

「話時話，呢度工廈嚟㗎喎！施金蘭都住喺呢度？」

「陳天倫佢好似冇同父母一齊搬去新樓，而係自己搬咗出嚟住。」阿Jill答。

「冇辦法啦，只好喺佢個仔身上套料！」

我們走進了新蒲崗某棟工業大廈的客用電梯，按下了往10樓的按鈕。電梯門搖搖晃晃地關上，電梯一邊爬升一邊發出彷似刮著牆壁的古怪聲音，配合著電梯內因部分照明壞掉而變得陰暗的光線，更覺陰森。





到了10樓，我們步出電梯，根據指示門牌穿過陰暗的巷子。走進了一扇門，又是一條比剛才還要窄的長長巷子。這些巷子兩邊都是一扇扇被關上的門，我們途中還曾經走進了死巷。

「1022、1023、1024…到喇！」終於，走在前面的阿Jill找到了目標單位了。

「貿然敲門係咪唔係幾好呢？」我的拳頭在1024號門牌的門上猶豫。

阿Jill抓著我的手腕，讓我的拳頭敲下去。應門的是一個少年，他開了一條門縫，從縫中伸出頭來看著我們。

我正想作自我介紹，少年卻先開口：「你咪係…8樓蕭太個仔？」





「咦？你識我？」我用食指指著自己。

「係呀，我媽咪以前試過甲狀腺有問題，8樓蕭太話佢個仔都係咁，就同我媽咪交流過點醫。我媽見親你哋都會提起，所以我知道你係邊個。」

「哇，我病果陣都成十年前嘅事喇。」我摸摸自己的頸項說。

阿Jill見陳天倫對我毫無戒心，便抓緊機會，打斷我們的客套寒暄：「陳生，唔好意思呀，我哋可唔可以入嚟坐吓呀？」

「叫我阿倫得啦。你哋想入嚟坐吓？」





「係呀，有啲嘢唔係好方便喺度傾。」我附和。

「咁呀、你哋喺度等陣先。」

阿倫又關上了門，門後傳來一連串收拾物品的聲音。每個人都有不想被別人看到的秘密，而他這個年紀的少年，沒有要藏起來的物品才是奇怪。

稍微等了一會，阿倫又打開了門探頭出來說：「你哋企開啲先，唔好企正喺門後面，如果唔係我開唔到門。」

聽罷，我跟阿Jill走過了一點，讓阿倫打開門。一看到門後的風景，我們都驚呆了，以致忘記了是我們自己要求進去的。

「快啲入嚟啦，如果唔係隔離屋行唔到㗎。」他瞄到走廊盡頭正向這個方向走過來的中年漢。

與其說我們走進了阿倫的房間，不如說走進了一個廁所，而且面積大概只夠一個成年男人躺平。

「地方淺窄，隨便坐！」阿倫示意我們坐在摺櫈跟一疊書上面，他則坐在墊了一塊厚毯、蓋上了馬桶蓋的馬桶上。我瞄到阿倫腳邊擺放了一堆清潔劑和消毒劑。這個「廁格」沒有異味，一定是阿倫勤力清潔的原因。





明明是要來摸清施金蘭的底細，我卻禁不住好奇，先問阿倫：「咁你瞓邊？」

他扭身，敲敲馬桶後的牆身說：「呢塊床板放落嚟，啱啱好卡喺馬桶同洗手盤上面。要去廁所或者沖涼果陣，將床板打直拍埋牆就ok。」

這間「房」內的樓底很矮，因為天花是一個個放滿私人物品的吊櫃。我估計，阿倫放下床板後就連坐直也會撞到頭部，他只能像太空艙一樣鑽進去睡。

「Sorry，但係…呢啲地方邊係人住㗎！」阿Jill瞪大了眼睛到處張望。

「呢間房9千蚊全包喎，已經好平㗎喇！」

「9千蚊？」我差點大叫。大學畢業生平均薪酬倒是多年來也維持在10k左右的水平。

「我不嬲有幫開中學生補習，家吓再返埋7仔，勉強夠生活㗎。」他倒是一臉樂觀，說：「遲吓搵到Full-time工就冇問題㗎喇。不過我仲要還關窿呀，我要再慳啲駛先得。」





「咁辛苦，點解唔同父母一齊住呀？」我忍不住問。雖然我明白這個年紀的男生都想要自由，都渴望能夠獨立自主。

怎料，阿倫竟然回答：「靠出賣香港得返嚟嘅樓，我係唔會住嘅！」

「吓？新港聯咁大手筆？」這令我更深信施金蘭有不可告人的秘密。

他握拳，輕輕打在自己大腿上，看來是在氣母親加入了新港聯。「以前一家人住開果度咪幾好！佢咁鐘意錢呀嘛，家吓有人送層樓寫佢名喇，俾佢恨到啦！」

不過，就算阿倫多麼懷緬過去的家園，現在想申請搬回去以前的公屋，也是沒可能的事了。因為他們一家剛剛搬離，房署便馬上安排了一對新移民婆孫入住了。

阿Jill眼見對話的走向對我方有利，便單刀直入問：「咁，你父母而家搬咗去邊？」

「吓？好似叫乜嘢…家吓啲樓盤名，改到懶有詩意但又冇厘意思，唔記得邊個打邊喇！」

本來怕再問下去恐怕會引起阿倫的懷疑，但看來阿倫也是站在香港市民利益的一方，於是我便直截了當地問：「咁你知唔知你媽咪有乜超能力？可唔可以講俾我哋知？」





「吓？唔知呀，我哋全家人都已經知道自己超能力，我阿爸有老花，佢能力係可以放大報紙啲字嚟睇。」他在雜物堆中拿出兩支鼓棍，繼續說：「而我呢，我想做鼓手，但我屋企根本冇位擺一套鼓。而家只要我用鼓棍敲任何嘢，啲聲都會變成鼓聲！」

他在旁邊的洗手盤敲打了幾下，敲出來的聲響果真是鼓聲，然後還響起了從隔壁牆傳過來的咒罵聲：「嘈撚夠未呀？」

阿倫怕我們對他的事沒有興趣，於是識趣地又把話題拉回去施金蘭身上：「但係只有我阿媽，懶神秘咁冇講佢個超能力出嚟。你哋點解咁有興趣？」

「你有睇到新聞呀可，施…你媽媽動議嘅議案。」

「我知道，網上有好多反對嘅聲音。」

「我哋懷疑伯母佢……」

「屌你老母！仲嘈呀？」隔壁又傳來怒不可遏地踢牆的聲音。





阿倫放輕聲線說：「隔離果個癲佬嚟㗎！我哋交換whatsapp先啦，你哋有乜想知就隨時搵我啦！我都唔希望我媽咪害人！」

跟阿倫道別後，我跟阿Jill一起在無人的工業區走路去地鐵站。一路上，平日多話的阿Jill也沒有主動說話。我先打破沉默：「太好喇，估唔到施金蘭個仔係好人！而且仲咁幫我哋！」

阿Jill聽著我說話，點點頭，看起來很疲倦。

「你冇嘢呀嘛？」

「我有少少頭痛啫。」

「吓？我送你返屋企啦！」

「唔驚喎，我成日都頭痛㗎啦！我屋企好近地鐵站，而且，撞到我daddy就唔好喇。」她笑說。

我們各自回家休息，隔天早上醒來，阿Jill又回復朝氣跟我在whatsapp交換情報，我也信心滿滿地跟她部署下一步行動。昨晚結識的阿倫，是一個耿直、有夢想的年青人。有了這個戰友，我跟阿Jill就更有勇氣對抗新港聯的陰謀了。

我急不及待走出客廳，收看今天的晨間新聞報導，看看有沒有新港聯的消息。

「新蒲崗一棟工業大廈10樓發生火警。起火現場係違規改建嘅劏房，凌晨1時懷疑因為電線短路引發火警。消防員於早上6時40分將火撲熄，現場發現多具焦屍……」