《我獲得一個願望，我選擇左係學校做一次男神》: 第二十五章：傾 心

「女神無揀到就死左。」下，死得咁突然，你起碼都講下佢點死，唔係，係講下佢點解死啊。
「點解既？」
「係我殺左佢。」我吞左啖口水，當佢親自講出黎既時候，先能夠感受到個種震撼感。
「當佢躊躇緊既時候，我不斷煩住佢，不斷問佢，但係女神開始感到唔耐煩，再問既話，就一定唔會係我咁話，我好傷心，我付出咁多為左啲咩？就係為左一個女仔，一個自己真正鍾意既女仔，但係佢卻唔領情，甚至係最後揀左另外個個男仔。」我再吞一吞口水，究竟我係追穎心方法上出左咩錯，導致最後都係無法令佢留低。
「但係你點解殺左佢既... 」我都盡量細聲啲講，費事比其他人聽到。
「我接受唔到個個男仔同女神一齊，呢樣都算，但係不斷係我面前逞強，甚至係同學到詆毀我，話我係痴漢；當我認為自己一無所有既時候，我決定乾脆利落，殺左個男仔。」唉，求愛不遂就去殺人，會唔會太誇張。
「雖然第一次暗殺唔成功，仲搞到成身傷痕。」原來傷痕係暗殺不成功得黎，咁個男仔都幾犀利。
「第二次，趁佢同女神出街，我一箭雙雕，捉晒兩個返黎，慢慢折磨個男仔，邊個叫佢搞到我無左隻眼，仲要留疤係我塊面到；我只好對佢做返同樣既野；而女神係我心目中已經由愛變恨，為左報復佢所揀選既，我要佢親眼睇住自己男朋友死。」
「到最後，我都無謂講點樣殺死個男仔，但係女神係自己跳樓死既。」好恐怖，拆散一對鴛鴦，只係為左一時之氣，就殺左一個人，咁但係點解阿龍話自己殺左女神呢？
「係天台上面，佢喊住企起到，不斷罵我，我都好無奈，選擇係你自己揀，最初揀我咪唔會變成咁。無錯，當時的確係咁諗。但係，我個陣已經失去理智，我仲不斷行埋去，問佢肯唔肯做我女朋友，問左佢好多次，佢最後都凈係話要返個男仔，當我最後想問多佢最後一次既時候，佢寧願跳落去，都唔願意要我。到而家，經過坐監既洗禮，我當然後悔自己做過呢啲事情，甚至覺得我係親手殺死左女神。」講完之後，佢好似鬆左啖氣，臉色都無咁繃緊，但係佢仍然後悔；佢每日坐係到，望住花叢，而隔離唔比人坐，我諗坐緊既係阿龍既女神。





「同你講完，我都舒服左，但係罪疚感都係咁重；所以我每日都坐係到，用一個鐘既時間，用盡我畢生既詞語，句子，同女神道歉。」我知佢咁做都係為左罪疚感輕啲。唉，由愛變恨，甚至逼到自己愛既人跳樓，而家係醫院留醫，變得一無所有。愛情，可以係天使，更可以係魔鬼。

阿龍最後無流淚，因為單眼流淚會好痛，寧願忍住，寧願淚留在心，都唔想比女神見到，只可惜一切都後悔莫及。
「多謝你，其實我無精神病，我只係覺得係醫院係一個世隔絕既地方，又有花花草草，清新既感覺，就唔洗成日諗住件事。」本來我都呆左，但係我好肯定佢真係無精神病，一個有精神病既人講野點會咁有條理，甚至正常過普通人。
「我都多謝你，我將來諗住做社工，多謝你能夠比到經驗我。」雖然我無乜點開解佢，但係我講過，一個開解人既人，唔需要多說話，反而多聆聽，令被人輔導既拔出心中既刺，而佢自己先係最有用既社工。
「時間唔早，係時候返病房，亦係時候離開呢到，面對返現實。」估唔到，分享完自己經歷，甚至會決定離開桃園，返回世俗。
「最後，比心機，我睇得出你有心結未打開，同你講呀，其實我之前係心理學家。」

當佢走到一半既時候，大聲講左句：「解鈴人還需繫鈴人！」我真係呆左企係到，原來一個痴線佬都可以係心理學家，係名符其實既心理學家。我明明咩都無講，但係佢一點即中，但係我既心結究竟係穎心定係芊雪。





白希龍，我唔會忘記你，不竟大家都係姓白，大家都經歷過被愛人所棄；但係細心啲睇，係我身邊，仍然有芊雪，我會好好珍惜，就算最後得不到，亦唔會強求，半年時間，得唔得都好，我都無仇無怨。