[扮工中環傳] 第八章 是咁的,我係政府二打六
 
END之前,講下政府工各種外人關注既野,福利、返工地點、轉部門之類。
政府褔利有睇醫生、牙醫、公屋,其他有都無人記得,無雙糧先換來咁既爛福利咋,福佳。
睇牙醫要排半年,仲係打去A診所,「我地要排到明年今日喎,不如你打去第二間丫」,
然後係快好多既B診所,半年就得,雖然快左成倍,但都係等到牙都甩。
 
 
最重要福利係排公屋,公務員可以唔駛睇入息排另一條隊,聽講有人為左呢樣而入政府,
但快就唔會點快,一樣都要排十幾年,排得來都已經要諗骨灰um位。


高級政府職位,聽講有housing allowance,又有讀書津貼,總之唔駛憂,
我會努力讀書博升職,政府好多不為人知既升職途徑,係要入去做落先知,易過街外人亂考。
 
 
返工地點方面,
返工地點無得揀,政府不論地址,唯才是用,
話之你住天水圍照派柴灣,住柴灣派返天水圍,要解決就自己交換老豆啦。
聽上司講,佢年代有得揀九龍東之類五大區域,可能而家政府見太公平,而家無得揀。
返工崗位無得揀,你可以學我之前講,九大範疇入面,好強調自己擅長某一項;
早知我強調「我最擅長就係同後生女仔相處架啦」,就唔駛搞到而家咁(望向40c9同事們)。


 
 
轉部門方面,三年試用期滿先可以申請轉,之後每做一年就可以申請轉,
不過我問上司,唔知係咪佢兇我唔想我走,佢話,通常申請調,就會丟你去圖書館。
圖書館係政府工頭號厭惡性職位,難聽過粗口,因為要返星期六日,返shift,bull shift;
圖書館長期缺人,如果你申請調部門,通常會丟你去圖書館,
通常果d人做一年圖書館,又會申請調走,loop,「坐一年圖書館監」。
面試唔想入圖書館,可以考慮講「我最憎就係書,我好支持焚書坑儒架。」(後果自負)
 
 


仲有一樣精彩野,就係公務員之間點樣互相耍太極,不過諗諗下都係唔敢寫,
因為而家政府有申訴專員公署,容乜易有人拎呢篇文來做證據搵我。我做野好勤力。
我試過搵其他部門做野,佢話
「我拒絕做你講既事,我認為係唔駛做既,要我做就搵(上上上司)以上職級既人寄EMAIL叫我做。」
最後確實搵左上上上司出EMAIL,逼佢死死氣做返俾我。
又試過「我地覺得無做錯喎,會唔會係你地錯呢,你返左呢份工幾耐呀,你係咪新來架。」
最後我FAX左十幾廿頁文件俾佢,證明佢係錯,又搵佢上上司講,佢先死死氣做返俾我。
再講就申訴專員公署會搵我。
 
諗住寫幾句點知夠一篇量,講人壞話真係好開心,一講就欲罷不能。