中醫成長之路 - 益泰傳: 第七章：忘掉病名方證，總以脈看一氣

廖女士足足沉睡了兩小時。
這兩個小時對林志遠而言，感覺上比學院讀的六年還要漫長。廖女士醒來時，眼中的驚恐、焦躁已退大半。她一邊揉著眼睛，一邊難以置信地摸著自己不再冰冷的手掌，喃喃自語道：「我竟然…喺度瞓著咗？林醫師，海師傅，我好耐無試過瞓得咁冧喇，又成身暖笠笠，好鬼舒服。」
海大富未有理會，一邊逗弄著「陳皮」，一邊沒好氣地擺擺手：「舒服就快啲翻屋企瞓，唔好阻住我收鋪。呢度六日藥，每日一劑分兩次飲。另外生冷嘢、凍飲、冷氣全部同我戒晒佢。吾戒嘅話，神仙都難救！」

送走廖女士後，夜幕俏然降臨。深水埗街頭霓虹亮起，大牌檔的油煙味，與遠處車水馬龍的喧囂交織在一起。診所內，林志遠呆立在案桌前，看著那些執藥時的藥碎，整個人看得出神。
「發咩吽哣呀你？執埋啲手尾啦First Hon。」海大富點了一根煙，煙霧在昏暗的燈光下繚繞開來。

林志遠猛然轉身，向著海大富作出90度鞠躬，誠懇地道：「海師傅，我求你教吓我！」他聲音沙啞，眼眶通紅，流露出這個半月來所壓抑的委屈、迷茫與不甘。






「我以前喺學校，個個學期都『爆4』，我以為中醫醫病最極致既做法，係『方證配對』。」
「失眠、心慌、頭痛，中醫教材話係心火上炎，西醫就話係自律神經失調。噉點解…點解你用乾薑同人參呢啲溫熱藥，反而可以治好佢喱團『火』嘅？我真係諗唔通，求你教吓我！」藥櫃上的陳皮歪了歪頭，碧綠的貓眼在黑暗中閃爍著。
海大富看著這個低下頭的年輕人，難得地沒有破口大罵或嘲笑。他深深地吸了一口煙，吐出一個煙圈，眼神穿過裊裊煙霧變得無比深邃，若有所思。

「你想學？好，我今日就教你做真正中醫嘅第一步！」海大富用馬報拍了他頭顱一下，力道並不大。
「同我企返直嗰人！」「首先，同我忘記晒你腦入面嗰啲西醫病名，仲有中醫嘅『失眠』、『頭痛』呢啲病名，都同我一齊忘記晒佢！」
林志遠摸摸後腦一臉錯愕：「忘記晒啲病名？無病名，點樣辨證？點樣開方呀？」
「所以話你讀死書！」海大富冷笑一聲，走到牆邊，將那幅已經泛黃的「陰陽變化圖」用力一拍。





「天地之間，不過係一團氣喺度轉。身體亦都一樣。《四聖心源》講得好清楚，人體後天嘅生機，全靠中焦脾胃。而脾胃既旋動係依靠下焦相火既溫煦，當脾土能夠左旋，就可以帶動肝氣、心火升浮；而胃土右旋，會帶動肺金、腎水降藏。火隨金降，噉先可以溫養下焦，令陰中有陽，然後水又能夠溫升去滋潤心火，令陽中有陰。於是陰升陽降循環不斷，呢啲就叫陰陽交泰，一氣周流…」

海大富再指著廖女士張處方副本，語氣變得嚴厲：「條女體內嗰股根本唔係真火，嗰啲係『客熱』嚟！佢原本就脾胃虛寒，你嗰陣用大大劑龍膽瀉肝去轟炸佢，直接將佢個胃氣凍死咗。胃土唔能夠右降，相火同心火被拒之門外無路可降，自然就積晒喺上焦。被逆火所擾，所以佢先會又頭痛、又心慌、又失眠。咁上面嘅火落吾倒去，下焦自然一片冰天雪地，脾胃無咗下焦相火既溫煦，運化無力自然就肚脹、痾水 同 手腳冰凍。」
林志遠聽得目瞪口呆，大腦瘋狂地運轉，試圖將海大富的話與自己所學互相印證。暗道：「原來係可以噉樣 整體地去思考病機！」
「你以前睇病，頭痛醫頭腳痛醫腳，見到倒火旺就清火，見倒堆病症乎合邊條湯方嘅條文，你就揀嚟用。你咁樣做只係玩緊『藥症配對』！」
「根本就無攪清楚病人身體究竟發生緊咩事！」海大富走到林志遠面前，用那根夾著煙、熏得發黃的手指狠狠戳了戳他的心口。

「真正嘅中醫，心入面最重要係要有一幅活生生、喺度轉動緊嘅氣機圖。黃芽湯入面嘅乾薑、人參，唔係去安神，亦唔係去清火，而係去溫暖返佢個中焦冰封咗嘅脾土！中氣只要一暖，就等於幫個生咗鏽嘅軸心落咗潤滑油。軸心一轉，上焦浮游嘅虛火自然順著胃氣降返落嚟，下焦有返相火，水升火降就能夠恢復。只要水火既濟，輪軸復運，佢又點會瞓唔著？」「心入面無病名，只有一幅活生生、轉動緊嘅氣機圖…」林志遠失神地重複著這幾句話。





此時此刻，他感覺到自己多年的所學所用被徹底顛覆，而同一時間，一條從未見過、廣闊無限的醫道大路，正在他眼前缓缓鋪展開來。

「點呀神醫，明吾明呀？」海大富冷笑著，又拍了他的頭一下。「諗通晒就快啲去幫『陳皮』鏟屎。」「同埋聽日開始跟診！」
「你記住呀吓，咪再畀我見到你用中環嗰套去睇症開方，夠膽再用我就直接用跌打藥酒灌死你。」