中醫成長之路 - 益泰傳: 第十章：暴風雨下的血崩之局
踏入八月，香港迎來颱風季節。晚上十一時，天文台正懸掛九號烈風或暴風增強信號，而黑色暴雨警告同時生效。
風雨交加，吹得醫館的舊窗框「哐啷」作響，彷彿隨時會散架似的，可「陳皮」卻不受影響，正在藥櫃上酣睡。
林志遠正坐在案桌前，小心翼翼地翻動著那本，由清代名醫「唐容川」，在經過無數生關死劫的醫案後，所淬煉出來的心血結晶《血證論》。
這本海大富的珍藏，已經頁邊起角、且散發著一絲霉味。在書頁空白處，寫滿了密密麻麻的批註 及 臨床心得。這些字體秀麗的小字，與海大富平日言行個性絕不相襯。
「喂，睇醫書吾同睇小說，要用吓個腦至得㗎。」海大富不知是何時走到林志遠身後，左手裡拿著一枝飲了數口的孖蒸，右手側敲了林志遠後腦數下，敲得『咚咚』作響。然後海大富在他對面坐下，目光炯炯地問道：
「First Hon我考吓你，如果今日嚟一個大口大口噉嘔血，又或者係流M不止，總之就係一個失血失到無氣無力嘅病人。」
「如果重有時間比你用藥急煎，你第一時間會揀咩野藥？」
------------------------------------------
林志遠抬起頭，爽快地回答：
「如果依照以前學校教嘅標準流程，第一時間當然係止血。」
「會以重劑量嘅仙鶴草、側柏葉、血餘炭呢類止血斂血嘅藥。」
「然後再交比救護員施展止血程序，總之就先將出血止住，保住病人條命先。」
「啪！」海大富一巴掌狠狠拍在案桌上，力道之大，把趴在藥櫃上酣睡的「陳皮」，也嚇得立時驚醒，牠不滿地對著海大富用力「喵」了一聲。 海大富瞪起一雙精光暴烈的眼睛，破口大罵：
「無錯！止血係必需嘅！但頭痛醫頭、腳痛醫腳，永遠係中醫嘅大忌嚟！」
「你一味用寒涼、收斂嘅藥去止血，血的確係可以暫時流少啲，但嗰啲未流出嚟，又已經離開咗經絡血脈嘅血呢？」
「佢哋吾郁、停左響道就會凝結變成瘀血！瘀血滲返落經絡血脈就會形成堵塞。噉經絡血脈中嘅新血就會無路可走，谷住響道。
「 「過多幾日，只會爆得仲金！」
------------------------------------------
海大富一把奪過林志遠手上的《血證論》，翻到卷二《吐血》篇章，指著當中段落一字一句地讀道：
「血止之後。其離經而未吐出者，是為瘀血，既與好血不相合，反與好血不相能。或壅而成熱，或變而為癆，或結瘕，或刺痛，日久變證，未可預料，必亟為消除，以免後來諸患，故以消瘀為第二法。」
「唐容川講得清清楚楚，治血四法：止血、消瘀、寧血、補血。」
「治出血證唔可以只係單純止血，即使係危急嘅出血，都要在『止』『消』『寧』『補』四方面同時著手！」
「如果無清掃血道，無令到血嘅流動回復返正常穩定狀態、無除舊補新，而只係識止血了事，噉樣治標不治本之餘，重會留底後患！」
------------------------------------------
林志遠聽得冷汗直流，他聯想起數月前，在中環向他求醫的地產商趙總。
當時因為自己醫術的庸俗，以「脈數為熱，熱者寒之」是常法，用大劑苦寒藥傷了趙總中氣，胃氣暴絕之下，臟血失統而暴脫，終釀成大禍。如果當時自己已懂得「四聖心源的整體觀」，以及「中氣對人身血份」的重要性，結局可能便會改寫。
正當林志遠陷入自責與反思時，醫館木門傳來一連串劇烈的拍打聲，緊接著「砰」的一聲，狂風連同撞門的人一起闖了進來。
一個哭泣著的中年婦人，全身濕透。而衣服上、裙擺上，盡是一片片觸目驚心的血跡。這名住在醫館樓上的街坊叫「李師奶」，此刻正方寸大亂，死死地抓著林志遠的衣袖，竭嘶底哩地道： 「救命呀林醫師、海師傅！我個囡喺屋企，流血流到就嚟死喇！」
林志遠聞言，神色一凜，立刻從凳子上跳起來：「慢慢講，到底發生咩事？」
婦人哭著道：「係M血啊！我十八歲嘅囡，之前本來只係經期嚟得吾準同量少，明明喱幾日多返啲，我仲以為會開始正常返，點知變到依家噉流到吾識停！」
「頭先我打咗999，接線生話好多路段有水浸同冧樹，話答我吾倒救護車幾時先嚟倒！我驚佢等唔切，會失血過多而死啊！」
------------------------------------------
崩漏，經血暴下不止，是婦科危急重症之一。
林志遠轉頭望向海大富，發覺他臉上少了平日的縱容。
海大富吐掉嘴裡的煙頭大聲喝道：「喂First Hon！喱種陰血暴亡嘅『危局』，如果用教科書嗰套『見血止血』，佢個囡一定好快GG！唐容川《血證論》係點樣講嘅？」
「『血瘀於內，則新血不得歸經，因而暴下』！個女仔平時已經期吾準吾順，多數係中下寒濕而成嘅氣滯血瘀。」
「而『同氣相感』，今日啲雨落狗屎噉，佢體內濕氣更盛之下，瘀阻自然會更大。」
「新血無路可走之下，唯有亂衝亂撞噉自己搵出路！如果單純用收斂止血藥，瘀血死死留喺裡面，脈道只會塞得更死。」
「當藥力一過，只會流得更加慘烈！」
------------------------------------------
其實，海大富一邊說教，一邊已經在藥櫃抓藥並厲聲道：「好好記住！應付喱類危急血證就依八個字：『消瘀寧血，攻補兼施』！」
「First Hon！咪一碌木噉企喺度！你嗱嗱聲執齊針灸架生同急救包，跟李師奶上去睇住佢個囡，盡你所能同我頂住個雞頭先！」
「我急煎完劑藥即刻上黎！！記住帶電話，有咩攪吾掂即刻call我！」
林志遠先是黑人問號，然後反問道：「師傅呀！！！點解吾係你上去我留底？！」這是林志遠在醫館幫手以來，第一次稱海大富為「師傅」。
海大富隨即厲聲答道：「前晚響出面食多咗蝦、蟹！家下風濕痛發作得吾得呀！咪講噉多廢話，快啲同我起程！」
林志遠再次黑人問號…他清楚記得前日晚飯是食燒味，而非海鮮。
不過情況危急，不容他再怠慢半刻，
林志遠瞬間備好所需之物，便火速跟李師奶動身回家！