《廢柴人生》: 04 家庭會議

04 家庭會議

一個平平靜靜嘅晚上，家姐帶埋男朋友阿勞，嚟到茶餐廳食宵夜。

佢哋兩個一路食，就一路打情罵俏，睇到我都眼冤。我已經拎歪臉，仲聽到佢哋嘅玩笑聲，側邊啲食客都冇眼睇。

好煩呀，簡直影響市容！

喺啲食客走得七七八八，落咗半閘，我同阿媽埋緊數，老豆同幾個伙記洗廚房。





喺正式收舖前，家姐突然大大聲講：「媽！爸！同埋費柴！你哋過嚟吖，我有嘢要宣佈。」

阿媽好似好雀躍咁：「咩事呀？係咪要結婚呀？」

「唔係啩。」我搭咗句：「阿勞你唔係真係要同呢個男人婆過世吓嘩？」

家姐狠狠地打咗我手臂一下：「咩男人婆呀！我不知幾溫柔！」

「好痛呀頂。」我走開，坐喺佢對面，以免畀佢打多我一下。





老豆抹住手出嚟，有啲不耐煩：「點呀？咩事又要開家庭會議？」

「老豆，我同阿勞⋯⋯」家姐懶神秘，陰陰嘴笑。

全家人望住家姐，等佢開口宣佈結婚。

點知，佢話：「阿勞搵到一個好買家，出咗個好價錢⋯⋯」

老豆未聽完，就企起身：「得喇，你唔使講。我一定唔會賣舖！」講完就執埋條毛巾返入廚房。





「阿媽呀。」家姐搖住阿媽隻手，解釋一大餐：「呢度真係做唔長，趁有好價錢賣咗佢，好過之後賤價賣。阿勞收到消息，話呢度就嚟被收購，到時就畀發展商撳住嚟搶，冇得拗㗎喇。」

「係呀auntie，呢個價真係可遇不可求。呢個買家好闊綽，難得佢有興趣。」阿勞係做地產，年中賣過唔少盤，睇佢身光頸靚咁，一定好有錢：「我同佢都熟熟地，價錢可以再傾。」

「阿媽，你勸吓老豆啦。」家姐仲未搖完阿媽隻手。

阿媽搖搖頭，語重深長咁話：「要佢賣舖即係要咗佢條命，佢唔會賣㗎。」

「費柴，你點睇？」家姐望住我：「幫吓口啦。」

點呀你費柴芝，個商場啱啱先大裝修完，話呢度會被人收購都唔知係咪吹水。想拉埋我落水？咪使旨意我會企你嗰邊：「老豆話唔賣就唔賣。」

「反正你都唔會接手茶餐廳嘅啦，老豆阿媽都就快退休，不如快啲賣咗佢。拎啲錢嚟做其他生意， 或者⋯⋯」

「間舖養大你㗎衰女！」老豆喺廚房嗌出嚟，仲聽到啲大力掉煲聲，佢一定好嬲。






——