《廢柴人生》: 05 落單程式

05 落單程式

家姐同阿勞走咗之後，間舖就淨返我哋三個。老豆喺廚房煲煙，阿媽喺櫃枱繼續埋數，啲單對咗幾次都對唔啱，好苦惱。

我拎埋個電腦，走埋去：「一早就話啲嘢要入電腦㗎啦。」

「電腦啲嘢信唔過，又貴，都係手寫單最安全，一張一張容易對嘛。」阿媽拎起其中一張單，遞畀我睇：「望吓眼，呢個係叉燒飯定係叉雞飯。」

「叉雞飯加咸蛋，凍奶茶。」我放返低張單，畀個電腦阿媽睇：「我整咗個入單app，可以撳啲單入去，電腦會自動計數㗎喇。」





阿媽托一托副老花鏡：「咩嚟㗎，一格格，要撳邊度？」

「嗱，呢度晚餐價叉雞飯，呢度加半隻咸蛋，跟餐凍奶茶。」我示範畀佢睇：「你睇吓，咪72蚊囉。」

「嘩，你部電腦咁勁嘅。原來計漏咗隻咸蛋。」阿媽笑一笑，然後喺張單度加返6蚊，再攞另一張單嚟：「咁呢個呢？你睇吓個電腦係咪計到178蚊？」

我哋一邊埋數，阿媽又問我搵工搵成點。我都唔知點答佢，唔通話因為我個名好搞笑，所以冇人請咩，所以只係答等緊消息。

「第時我哋兩老退咗休或者死咗呢，呢間舖都係傳畀你哋兩姐弟㗎喇。」阿媽最鍾意無啦啦交代身後事：「趁而家有買家，你不如同家姐商量吓，係咪賣咗間舖對你哋最好啦。」





「但係呢間舖⋯⋯」我又搵到張計錯數嘅單。

「你唔使理你老豆㗎喇，佢都老啦，做唔長。」阿媽又篤計數機：「最緊要係你哋有筆錢，想做咩就做咩。」

我冇答佢。

最後，我幫佢搵到計錯數嗰幾張單出嚟，條數終於都啱返。我決定今晚整埋個介面，啲字要大隻啲，個掣要再大啲，等佢撳得順手啲。唔使日日咁樣計數，計到天荒地老，不如早啲返屋企休息吓仲好。

阿媽收埋數簿，走入廚房搵老豆返屋企：「好心你啦，食少枝煙會死咩？」





「就係會死。」老豆好似已經嬲完家姐，不過仍然講好多悔氣說話：「你咪聽個衰女講呀，我點都唔會賣舖，除非我死咗。」

「啋，你話過會長命過我㗎，唔准死住。」

「好嘅好嘅，你死先，咁得未？」

「唔准咒我死。」

「咁不如一齊咯？」

然後，我見到老豆拖住阿媽隻手走出嚟，收咗舖慢慢行返屋企嗰時都冇放開，仲一邊行一邊打情罵俏。啊⋯⋯又多一件眼冤嘅事。邊個死先嘅呢個問題，可唔可以唔好日日都喺度講呀，你哋唔厭我都聽到厭呀。

真係該煨，家姐應該真係盡得真傳，所以先會同阿勞明目張膽咁放閃。

唉，冇眼睇佢哋。






——