《廢柴人生》: 06 熱朱古力

06 熱朱古力

第二日，我更新咗個介面，畀阿媽試用。阿媽好似玩得好開心，好多嘢問：「如果凍檸茶少甜要點撳㗎？凍飲加錢個電腦識唔識計㗎？有冇轉出前一丁？」

老豆行過，淨係望咗兩眼，掉低咗句：「手寫單好地地做乜要改？有時間就去搵工啦費柴，咪喺度篤眼篤鼻。」然後就走入水吧。

「你又知我冇搵？」我點都要頂返佢轉頭：「我好快要返工，唔會落嚟幫手㗎喇。」

「係就快啲。」老豆沖咗杯熱朱古力，拎出嚟畀阿媽，轉埋個溫柔語氣：「睇熱呀。」





「我又要。」我聞到啲香味，又想飲。

「自己唔識沖呀？水吧嗰邊。」

哼，自己沖咪自己沖，朱古力粉溝水之嘛，鬼唔識咩。老豆仲要望住我沖，好，我就表演畀佢睇。沖完之後飲咗啖，飲到皺晒眉：「嘩，咁難飲嘅。」

老豆大笑：「話你廢真係廢。落奶呀。」

瘀到爆，我細細聲問企喺我側邊嘅秦伯：「要落奶嘅咩？」





秦伯笑笑口，幫我沖咗杯好味嘅熱朱古力。

「唔該秦伯。」

秦伯揚揚手，指指枱，再做飲嘢嘅手語，示意我出去坐低慢慢飲。

我一坐低，就收到電話。我望一下，3字頭，廣告電話。原本諗住放低，但係心血來潮，望多兩眼。咦？睇落去好似唔係見開嘅數字組合，於是我接咗⋯⋯

「請問係咪費柴軒先生？我哋係ONLINE設計公司打嚟，想約你聽日9點半上嚟HR部門簽約。」





「咩話？簽約？」我唔小心大聲嗌咗出嚟。

老豆、阿媽同秦伯，一齊望住我，流露出感動嘅眼神。

我得咗喇！我！終！於！有！工！返！喇！！


——