《廢柴人生》: 07 限時畫圖

07 限時畫圖

第一日返工，我著住Uniqlo買嘅全身恤衫西褲，走入去office，正準備推玻璃門入去之際，我見到入面全部人都係著T恤牛仔褲，啱啱有個行入走廊嘅人，仲著住拖鞋。

趁佢哋冇人留意到我，我即刻閃埋一二邊，抆返恤衫衫腳出嚟，解開啲鈕。好彩一早預咗放工就除恤衫，入面著咗白色Tee，即刻型咗一百倍。

推門入去，個個人都各有各忙，我都唔知要搵邊個好。

有一個矮我一個頭嘅女仔行過嚟，佢著住鬆身大Tee，長褲，戴住就嚟跌落地嘅粗框眼鏡，冇化妝，長髪隨意用大髪夾住。





我怯一怯，退後咗兩步，哇，佢行埋嚟做咩？

佢喺我面前停低，矇住眼咁望住我，手搭住咗喺我膊頭，無厘神氣咁講：「你就係費柴軒⋯⋯係咪？」

我聞到佢身體發出嘅味道，嗯？竟然係陣陣嘅香氣？我仲以為佢會係幾日冇沖涼嗰啲friend添。

「係⋯⋯」我唔知推唔推開佢好，定係再退後少少呢⋯⋯

「快啲入嚟救命⋯⋯」佢拉住我手臂，轉身行得好快好快，吟吟沉沉：「喺畀隔離team見到之前⋯⋯我要搶咗先⋯⋯搶咗先我哋就有救⋯⋯」





佢帶我去到一間會議室，入面仲有兩個人。兩個人嘅精神狀態都迷迷糊糊咁，但係見到我，眼都即刻撐大十倍。

佢示意我坐喺個電腦面前，放咗一張圖喺我面前：「五百呎，糖水舖，L型，門口喺左下角。我哋淨返十五分鐘就要交畀經理，手畫快啲定電腦畫快啲？」

我估我明佢想我做咩，我睇咗佢哋用手畫嘅幾份圖，份份都畀人畫咗個大交叉。我望多兩眼，喂呀，個廚房位咁細點夠，個水位仲咁遠，咁搞唔掂喎。

我拎起筆，喺一份新嘅平圖上面畫畫畫。喺水位嗰度畫廚房，再畫埋啲雪櫃、碗櫃、昇盤，然後再到收銀櫃枱、食客嘅枱櫈。

佢哋嘅精神完全返返嚟，開始同我講已經設計好嘅枱櫈大細。嗰個女仔就開始分工，叫一個人畫埋個天花板、牆身，另一個人開始打新嘅proposal，而佢就將我畫嘅嘢，喺另一張紙度畫立體圖。






——