《廢柴人生》: 08 生化武器

08 生化武器

我哋成team人，喺最後一刻，拎住份設計圖同proposal衝入經理房。

入到去，有一個眼超超又高高大大嘅大隻佬，企喺經理枱前，佢個嘴戚咗下：「哼，睇吓你今次交啲咩出嚟。」

藍經理撥一撥乾旱嘅長髮，搽咗鮮紅色唇膏嘅烈焰紅唇慢慢張開。正當我疑惑緊做咩全部人靜靜地吸咗一啖氣，加上微微向後退半步嘅時候，一陣強烈嘅餿臭味，直撲入我個鼻。哇！好臭！咩料？

我咳咗兩聲，臭味隨住經理講嘢嘅時長慢慢累積，成間房愈嚟愈臭。我隔籬嗰兩個組員仲搵藉口開門走埋添。我心諗：「哇⋯⋯佢個口咁臭，我係咪都要出一出去會好啲？」





但係大隻佬同我嘅組長面不改容咁企喺度聽，唔通佢哋有啲咩秘技，可以僻咗佢浸口臭味？

唔係喇，喺未有秘技之前，都係走為上著。

正當我想走出經理房嘅時候，藍經理笑笑口咁望住我：「呢個設計唔錯，係你負責嘅？」

我嚇咗一嚇，企直啲個人，我唔敢大力吸氣，只係細細聲咁應佢：「係⋯⋯」

「費柴軒，果然名副其實，我哋冇請錯人。」





大隻佬盡力恥笑：「費⋯⋯柴？哈哈哈！」

藍經理企咗起身，然後大隻佬同組長紅海咁分開咗兩邊。而佢就喺中間，一邊行埋嚟一邊講：「之前喺唔少比賽都見過你個名，我一直都有留意你。」

浸味愈嚟愈濃烈，我忍住咗呼吸，我唔敢掩鼻，我唔敢退後，我唔敢咳⋯⋯我⋯⋯唔得喇⋯⋯

突然，耳鳴一聲。嗚——成個世界黑晒。


——