《廢柴人生》: 09 仇人見面

09 仇人見面

矇矇矓矓之間，我唔知係發夢定係點，穩約聽到有人喺度討論緊我。

「喂，你睇吓佢個名牌，真係寫住『廢柴』嗰喎！」「少少味都頂唔住？有冇廢都咁呀？」「咁都暈得低，睇嚟都做唔長㗎喇。」

「唔該你哋啲唔關事嘅人快啲離開，呢度要足夠嘅氧氣。」咦？呢把聲咁熟嘅？喺公司入面，我都唔識其他人，唔通⋯⋯佢係⋯⋯我嘅組長？

我想擘大眼，見到自己喺pantry度，喺我面前企咗幾個人。但係，佢哋掛住講，冇留意到我醒咗。





「唔係喎，頭先經理都有讚呢條廢柴攞過好多獎，好勁咁。嵐姐，不如⋯⋯」大隻佬行埋去嵐姐度。

「唔好同我講咁多，Hinson係我嘅，你唔可以搶。」嵐姐答得好堅定，拍晒枱咁。我聽到都有啲心動，第一日返工就有上司咁攬我。

「好好，你唔好咁惡先。起晒鋼咁做咩啫，大家一場同事，坐低慢慢講。」大隻佬好奸險，退返少少。

佢側邊有兩個同事：「赫哥，個個都走晒嚟我哋呢邊，嵐姐條team得返兩個intern。」「咪當可憐吓佢，廢柴送畀用一陣。」

「好，睇佢個樣咁孱，應該都唔捱得㗎喇，都係唔好拖累我哋條team。」大隻佬笑得好樣衰：「呢個廢柴，送畀你。哈！」





「你哋最好快啲離開，今日係我用呢度。」嵐姐對住佢哋講嘢係冇尾音，好掘。

「得得得，嵐姐叫到，我哋走。唔好阻住啲廢人休養生息。」大隻佬揚揚手：「走，今日食壽司，我請。」

「多謝赫哥。」嘍囉嘅標準答案。

佢哋走咗之後，嵐姐坐咗喺我腳邊，長長咁呼咗一口氣，碎碎念：「乞人僧，鬼唔望你哋食到生蟲！」

我隻手按按個頭，個頭仲痛痛地，唔知頭先有冇撞親個頭呢？但係嵐姐好似仲未察覺到我醒咗，於是我慢慢坐喺身，輕輕掂一掂佢膊頭：「嵐姐⋯⋯」





「哇呀！」佢嚇到反手捉住我隻手，再拉我過去，一鎚窩落我個肚度。

「呀——」

反應快到咁，係咪痴線㗎⋯⋯好痛⋯⋯


——