《廢柴人生》: 10 自作多情

10 自作多情

嵐姐即刻放開我隻手：「Sorry sorry呀⋯⋯我冇心㗎。」

我攬住自己個肚，隻痛係入面發出嚟，痛到我講唔到嘢。

佢一邊道歉一邊拍拍我膊頭，安慰我：「Sorry呀，係咪好痛⋯⋯」

「係⋯⋯」我答完之後，突然覺得咁直接好似唔係咁好，於是我改答案：「唔係⋯⋯少少啫⋯⋯」





「真係？」佢好擔心咁望住我，我畀咗個『唔痛嘅微笑』佢。佢充滿懷疑咁望住我，我哋四目交投咗十幾妙，佢突然瞇住雙眼，好似頭先我入嚟office咁，一直哄過嚟。

我唔敢郁，都唔敢出聲，唔通，第一日就要獻上我嘅初吻？望真啲，佢都幾眉清目秀，係靚女嚟嘅。

佢再哄埋啲，我哋嘅距離淨返唔到五十厘米⋯⋯

打咗我一鎚，錫返我一啖補數⋯⋯

佢扁一扁嘴。





雖然係初吻，但係⋯⋯佢好香，好啦⋯⋯我ready喇！

「我真係冇睇錯，好多黑頭呀你！」佢講完之後，就企咗起身，走咗出pantry。

我呆住咗，吓？唔係錫咩？

嵐姐好快返咗嚟，拎住張濕紙巾抺我個鼻，然後，痴咗一塊嘢喺我個鼻度：「喺我條team做嘢，唔可以污糟邋遢，要乾淨。」

「咩嚟㗎？」我指住我個鼻。





「唔好搞呀，三十分鐘之後先可以搣走。」

「哦⋯⋯」原來，係我自作多情⋯⋯我放低咗手，企起身整理吓自己，順利整理吓心情。

「你都好渣喎，咁易暈低。」佢望住我，笑咗吓，不過，唔係恥笑我嘅笑：「我同藍經理解釋咗，話你冇食早餐，血糖低所以暈。」

「唔該晒。」我睇睇錶，十二點半，自己同自己講：「三十分鐘，即係一點。」

「乜你聽話嘅？」佢又瞇住眼望我。

「吓？」我唔知點答佢，同埋佢咁樣望住我，我都有啲唔自在，搞到我面都紅晒：「唔係，唔係呀。」

「你真係諗住貼三十分鐘？」佢指住我個鼻。

「你話㗎嘛⋯⋯咁我咪⋯⋯」我隔住塊貼搲搲個鼻。





「哈哈哈哈！」佢好似好開心咁，但係我唔知佢笑緊乜。然後佢遞咗一隻手指咁長嘅細樽畀我：「下次入經理房之前，索兩下，再搽少少喺個鼻底。送畀你旁身。」

我雙手接過：「多謝。」

「而家lunch hour，阿A同阿B出咗去拎外賣，買埋你嗰份㗎喇。」嵐姐行去廚櫃拎餐具：「應該就返到，可唔可以幫手抺抺枱？」

「嗯。」我喺枱面拎咗張濕紙巾抺枱，嵐姐又望住我喺度笑。

呀⋯⋯佢係咪鍾意咗我？


——