《廢柴人生》: 11 孤軍作戰

11 孤軍作戰

阿A同阿B拎住兩袋外賣返嚟，乾炒牛河，星洲炒米每樣兩盒，飲品。

嵐姐話：「今日終於都完咗糖水舖嘅設計，我請你哋食。」

「多謝。」我哋三個異口同聲。

我哋拆緊盒，我好奇問起：「我想問吓呢，嗰個大隻佬，係邊個嚟？」





頭先我一返到嚟就開始搏殺，交完稿就直接暈咗，真係唔知發生過咩事。

「呢個部門有兩條team，一條係我做組長，另一條係嗰個曾仁赫嘅。」

「咩話？」我聽得唔太清楚。

「曾仁赫呀，好唔順口呢，調返轉就順口好多，你叫佢乞人僧就得㗎喇。」

「乞人僧⋯⋯哈哈！」我心諗暗暗爽咗一下，原來有人個名仲衰過我：「係呢，咁佢哋條數team有幾多人？」





「十個。」阿A講：「之前嵐姐講過，原本就每人分五個嘅，但係赫哥就威迫利誘晒啲人過去。」

阿B仲話：「如果我哋兩個唔喺度，嵐姐就得返一個人。」

我真係唔太明，乜可以咁嘅咩：「但係你兩個係intern，唔係正式員工嚟。」

「我哋今個星期五就last day喇。」阿A個樣有啲唔捨得咁：「我會掛住你㗎嵐姐。」

阿B食住啖河粉答：「我都係。」





嵐姐笑咗一笑：「星期五我哋一齊出去食放題，我請，好唔好？」

「好啊！」「嵐姐萬歲！」

我心諗，嵐姐做過啲咩得罪嗰個衰人，定係，赫哥有啲咩後台，個個都要跟住佢。

「喂，做咩呆咗。」嵐姐推推我手臂：「放題可以請埋你㗎，一唔一齊？」

「嗯⋯⋯好啊。多謝嵐姐。」


——