《廢柴人生》: 12 乾炒牛河

12 乾炒牛河

呢盒牛河，我愈食就愈覺得浸味好熟。呢個咸甜度、配料嘅份量、連辣醬嘅牌子都⋯⋯嗯？唔通係我老豆間茶餐廳嘅？

我望一望張單——飯忠茶餐廳！

真係喎！

正當我想講間茶餐廳係老豆開嘅時候，硬係好似係有把聲叫我唔好講咁。所以我都係決定唔好咁張揚，一陣人哋以為我懶叻。喺公司入面，都係保障返自己啲私隱好啲。





點知隔咗陣，嵐姐喺度話：「呢間茶餐廳真係幾好食，大碟又抵食，不過可惜吖。」

「可惜？」我豎起耳仔聽。

「就嚟會執笠，冇得食咁好味嘅牛河。」

「邊會呀？」我好奇怪，心諗我自己都唔知道會執笠，點解你會知？

「隔兩條街嗰個街坊商場吖嘛，好快冇㗎喇。」





「唔係啱啱先成個商場裝修完咩？」

嵐姐聳聳肩：「名義上係活化，實際上係裝修完先可以賣更高價。而家大把發展商喉住，想成塊地買起，嗰度總共係兩條街。」

「真㗎？」關乎老豆間舖，我有啲緊張咁問。

「呃你做咩喎。」嵐姐已經食完，收拾緊外賣盒：「食完飯我哋就要將兩條街重新規劃，星期五要交初稿。」

「吓？」





資訊量有點過大，我唔係好負荷到。即係啱啱裝完修，都可以被收購？仲要剷咗兩條街？咁間舖點算？


——