《廢柴人生》: 13 晚飯覺醒

13 晚飯覺醒

第一日返工就開OT，放工返到茶餐廳都已經十點幾十一點。

「今日第一日返工返成點呀？啲老闆好唔好人㗎？」阿媽見到我就問：「做乜咁夜嘅？」

「幾好。大老闆有口臭。臭到我⋯⋯暈低咗。」我笑笑口咁講。

「暈低咗？」阿媽即刻走埋嚟扶住我，好擔心帶我埋位：「幾時嘅事？點知唔通知家長？」





我手踭轉個圈，甩走阿媽隻手：「咩家長呀？我返工呀唔係返學。」

側邊啲熟客聽到，笑到卡卡聲：「細佬，佢有幾臭？我都想聞吓喎。」

「總之就係臭。」我唔想解釋太多，行去水吧斟水飲，加兩舊冰。

秦伯打手語問我有冇事。我擰擰頭，打咗句「臭到想死」。秦伯笑笑口拍拍我膊頭「好在死唔去」，然後我就笑住走返出樓面。

阿媽又擔心又嬲：「咁暈低咗係咪應該要通知屋企人先？你有冇撞親邊度？要唔要去醫院？」





「唔駛喇。」我攤坐低喺我個卡位度，等咗一陣，就有新鮮熱辣嘅飯餸送到。

今晚係魚香茄子，正！

我𡁻緊啖飯，對筷子喺個碗度撩撩吓，成個腦仲諗緊收購呢件事。

同老豆講？佢實企硬唔會賣。同阿媽講？佢都唔識咁多嘢。

最後一個，即係同家姐講？唔，睇嚟係。照佢上次咁講，佢哋一定知道啲內幕。





呢間舖，真係做唔到落去咩？

我望住啲的士佬，同阿媽有講有笑，仲同老豆大大聲，隔住個水吧喺度吹水。秦伯就算講唔到嘢，都可以同佢哋一齊吹。

再睇吓我而家坐緊呢個卡位，由細細個開始就喺度玩玩具、做功課，平日冇咩事都落嚟打躉、嘆冷氣。由細坐到大嘅個位，要畀人剷平？咁我仲可以坐喺邊？

我夾舊茄子放入口，再爬大啖飯。

唔得，唔可以賣咗間舖！

——