《廢柴人生》: 14 可口可樂

14 可口可樂

凌晨，終於等到家姐返嚟。

趁佢沖完涼啱啱入房，我拎咗兩罐無糖可樂入去搵佢：「喂，費柴芝，有嘢搵你。」

「點呀廢柴？無事獻殷勤。」雖然家姐把口咁講，但係佢都拎咗一罐，坐喺床上面開嚟飲。

「嗰日你同阿勞咪講過，會有人收購嘅，其實係咩事？」我單刀直入，無謂兜兜轉轉。





家姐斜啤住我：「你唔係幫老豆嘅咩？」

「我都想知件事係點嘅。」我扮晒企佢嗰邊先：「如果係咪都畀人收購，咁梗係趁好價賣啦。」

「醒目！」

家姐話，佢同阿勞間地產公司，係負責幫一個買家收舖。而嗰個買家，就係呢個大亨發展商。大亨同其他發展商鬥緊，邊個收得多就會承接成條街嘅擁有權。而家佢哋要去搶先收業權，要幫公司收夠數。

「咁你咪即係呃老豆？」





「梗係唔係咁講啦，如果我哋負責到呢條街，會分到好多佣。」家姐仲理直氣狀：「唔通益人哋咩？不如益自人人，係咪咁講先？」

「唔⋯⋯」我其實都唔係好聽得明佢講嘅嘢，不過睇嚟收鋪呢單嘢係堅嘅：「你覺得我哋係咪唔會保得住間舖？」

「你仲諗間舖？用吓腦啦，我哋點同啲發展商鬥呀？」家姐轉咗個陰森嘅語氣：「企硬冇好處。我只可以講，要喺畀人搞之前賣咗佢，唔係一身蟻。」

「搞？」我呆咗吓，家姐咁講得出，真係唔係小事。

「你明我講咩嘅。」家姐嘆口氣：「不如我哋諗吓點說服老豆仲好啦。佢最錫你，你同佢傾實得。」





「哦，我諗吓先。」

「唔好諗咁耐呀。」家姐補多句：「時間無多，最好呢兩、三個月內。」

「真咩？」

「呃你做咩。」家姐把口衰還衰，但唔似會為錢呃間舖嘅，佢咁做應該有原因。

我成晚都唔太瞓得著。

其實，我想留住間舖。

——