《廢柴人生》: 15 醒神咖啡

15 醒神咖啡

一大朝打住個喊露返工，拖住疲倦嘅步行去我個位。枱正上最sharp醒嘅，就係我疊新印好嘅咭片。

我即刻醒咗醒，拎咗張上手。哇，設計公司嘅咭片點都靚啲，摸上手就知用靚紙印，至少靚過家姐嗰張hea嘢。

咭片上面有最唔想面對嘅「費柴軒」，仲有我個英文「Fei Chai Hin, Hinson」。Hinson呢個名其實中學嗰時都已經用緊，但係都冇人嗌我英文名。

「Hinson！」





唔？邊個嗌我？我兩頭望，再拎返正嘅時候，嵐姐喺我面前近距離彈出嚟。

「哇！」我嚇到向後退，撞到喺後面行過嘅赫哥。

「我頂吖！」赫哥拎住杯熱咖啡，畀我撞到飛去半空。

時間喺呢刻好似拉咗慢鏡咁。我哋一齊望住杯熱咖啡，一齊伸手去接。側邊有人見到呢個情境，視線都跟住杯熱咖啡飛上天，個嘴擘到勁大O晒嘴。

熱咖啡喺空中轉咗半個圈，擺脫咗個杯蓋，熱辣辣嘅咖啡趁呢個時候逃離紙杯。赫哥收咗手，紙杯繼續向上飛，而咖啡就直接喺我手上面降落。





大部分熱咖啡經過我啲手指罅過濾，跌落地面。剩喺嗰啲，喺我手掌上面滾燙熱舞中。

「呀！！！」成個office嘅人都同我一齊嗌。

我熱到大叫，成個人跳跳吓，隻手周圍揈。哇！點解我接到嘅係唔係咖啡杯，而係咖啡without杯？！

嵐姐即刻拉咗我入pantry，喺水喉度沖水。

真係好痛，我仍然不停大叫，嵐姐係咁同我講嘢，但係我唔知佢講乜，手掌嘅痛覺已經掩蓋咗聽覺。





「我叫你唔好嘈呀！」嵐姐喺我耳邊大叫。

我終於聽到佢講咩。我靜落嚟，望住嵐姐。佢皺住眉咁幫我對手沖手：「杯咖啡跌落地咪有得佢囉，接咩啫你？」

「我⋯⋯就係想接住杯嘢⋯⋯吖嘛⋯⋯」我把聲好似做錯事嘅小朋友咁，好心虛。

呀⋯⋯隻手仲係好痛⋯⋯而家我成個人都醒晒，唔怪得有人話：比飲咖啡更提神，就係倒瀉咖啡。我仲要升級，畀咖啡淥親。

「唉。都唔知話你反應快，定係反應遲鈍好。」佢搖搖頭：「你沖住水先，我去拎藥膏同冰袋。」

「呃⋯⋯」

沖完水，抹乾。嵐姐遞個冰袋過嚟，不過我拒絕佢：「唔可以用冰敷㗎。」我正反手咁檢查一下，手掌有啲紅腫，仲有啲痛，但未見有水泡：「由得佢就得，好快冇事。」

「真係？」佢明顯係有啲擔心，拎住個冰袋唔知點算：「真係唔使？藥膏呢？」





「唔使，呢隻牌子太渣。」我笑咗笑：「我細個成日都淥親㗎，冇事冇事。」

「嗯？點解嘅？」

「屋企開餐廳，咁我成日都⋯⋯」我講到一半，停住咗。

嵐姐望住我，充滿疑惑：「開餐廳？喺邊度？」

弊⋯⋯

——