《廢柴人生》: 16 開會大戰

16 開會大戰

喺嵐姐帶住好奇嘅眼神望住我，我又口窒窒唔知點答佢嘅時候，竟然畀我哋嘅敵人赫哥救咗我。佢企喺pantry門邊大叫：「你兩隻嘢，快啲嚟開會先，大亨啲人到咗喇。」

嵐姐收起冰袋同藥膏，再望望我隻手： 「你OK？」

「OK。」雖然隻手仲痛緊，不過我點點頭。然後就跟住佢哋尾，行到大老闆房側邊嘅會議室。

入到去，成個會議室都好有嚴陣以待嘅氣氛。





會議長枱中間有兩張大班椅，左邊係我哋公司老闆藍總，右邊係地產發展商嘅老闆彭總。坐彭總隔籬嗰個人個樣串串貢，個頭gel到可以插死人嘅老士發型，三十出頭就油頭粉面，佢就係彭總個仔彭偉樂。

仲有一個，擘大個口就知道佢存在嘅全場唯一生化武器——藍經理，坐喺藍總嘅左手邊。

嵐姐用咗五秒，就同我解釋晒佢哋嘅人物關係。

藍總同藍經理係兩兄妹，想要全力討好彭總。只要拎到呢個project，有佢哋照住嘅話，公司就唔使休，永遠都唔會執笠。仲同我講要小心啲彭偉樂，因為呢個人好奸險，成日放暗箭，得罪佢唔會有好日子過。

不過，我最在意嘅，係坐我對面嘅阿勞同家姐。我同佢哋對視咗一眼，然後好有默契望返啲老闆，呢啲情況梗係扮唔識先啦。





「彭總，我哋有最好嘅設計團隊，一定會將你嗰兩條街變成新地標。」藍總把聲沙沙地，可能食煙太多，佢都有口臭：「會有好多遊客過嚟打咭。」

藍總啲口臭味飄咗過嚟，嵐姐輕輕掩住口鼻，挨近我細細聲問：「你枝嘢呢？」

「咩嘢？」啲口臭味已經幾濃烈吓，應該全間房嘅人都聞到。

嵐姐喺衫袋度拎咗個細樽出嚟，打開個蓋，樽口向住我：「頂住先。」

「唔該。」我用手指撩咗少少，揩落鼻底，臭味迅速減退。





「而家我都唔理太多喇，就快退休，要交畀個仔做喇。」彭總個樣其實都後生，完全唔似就嚟退休。

「好吖，偉樂都係叻仔嚟嘅，你放心都得啦。」藍總排啲煙屎牙黃黚黚：「我想交畀個女㗎，不過佢唔肯，點似得你個仔咁乖。」

「遲啲約埋你個女食餐飯。佢哋兩個啱嘅話，以後大把機會合作。」彭總笑到騎騎聲：「偉樂，話畀uncle知我哋嘅計劃。」

偉樂恭恭敬敬咁企起身，用powerpoint介紹講咗幾個佢哋名下嘅屋苑、商場、體育館，仲有五年、十年計劃。佢帶住奸笑，望住嵐姐講：「希望你哋team，可以幫我哋設計呢幾個商場。」

嵐姐耷低頭take notes，聽到好似冇聽到偉樂同佢講嘢咁，似係完全唔想同佢有任何接觸。

但係赫哥就醒唔切咁插嘴，仲講到自己條team有幾咁強大，同時處理幾個project都冇問題。

我一邊聽，見到嵐姐個樣，表現得極度唔耐煩。我想問吓佢做咩，點知篤一篤佢手臂嘅時候，佢好大反應咁拍開咗我隻手。喺呢個唔應該由我出聲嘅時候，我大叫一聲：「呀——」

嵐姐嚇咗跳，即刻同我say sorry，但係成個會議室嘅人都望住我。





偉樂笑笑口咁問我：「咦，未見過你嘅？新嚟？」

「我，新嚟嘅。」我企起身答：「我叫Hinson，係嵐姐team。」

我坐返低，偉樂又提問：「綽嵐，呢個商場交畀你條team，你搞唔搞得掂？ 」

赫哥想即時制止，想擸嚟做。但係嵐姐話：「有Hinson幫我，十個商場都得。」嵐姐講嘢嘅時候，完全冇望過偉樂，反而係望住我：「係咪？」

吓？我係咪要答？我O住嘴，指一指自己。「我⋯⋯」

嵐姐有冇咁睇得起我？我哋team得兩個人咋喎！阿A阿B要走㗎喇，我哋冇人㗎！佢唔係唔知嗰喎！

偉樂仰天一笑：「哈哈！好，就畀十個商場你設計。」然後就望住嵐姐，挑逗性咁單一下眼：「搞唔掂，記得嚟搵我。」





嵐姐哼一聲，冇再應佢。

赫哥又插嘴：「樂少，十個商場嘅話，佢哋team頂唔住㗎，畀啲我幫你搞啦。」

「綽嵐話得就得，我信佢。」偉樂飲咗啖咖啡，繼續講佢哋嘅大計。

我見到嵐姐好大力咁喺本筆記度寫字、畫緊草畫，好似心有不甘。我心諗佢同偉樂嘅關係，好似唔係咁簡單，佢哋係咪有十冤九仇？

——